Өмнөд хөршийнхөн жил бүрийн тавдугаар сарын 1-3-нд тохиодог Олон улсын хөдөлмөрчдийн эв санааны нэгдлийн өдөр буюу Мэйн баяраа тэмдэглэх тул авто замын боомтоо түр хааж байгаа аж. Үүнээс ч болсон уу тэнд машин тэрэг хахаж цацан, боомт ачааллаа дийлэхгүй байгаа тухай мэдээлэл ирлээ.

Энэ талаар Замын-Үүд дэх гаалийн газрын дарга Ё.Бат-Эрдэнээс тодруулав.

-Замын-Үүдээс Эрээний төв хүртэл машин дугаарласан, жолооч нар хоёр улсын хилийн дундын бүсэд хонож байна гэдэг үнэн үү?
-Ер нь ачаалал их байна. Хил дундын бүсэд маш олон машин, жолооч хонож байгаа. Хоёр талын хил гаалийнхан үүнийг цэгцэлж байгаа ч дийлдэхгүй нь. Манай талыг бодвол Хятадын хилийн цаана машин олон байна.

-Өдөрт хэчнээн машин орж гарч байна вэ?
-Өнгөрсөн долоо хоногийн дунджаар авч үзвэл өдөрт суудлын 300, ачааны 160-170 машин Эрээн рүү гарч, орж ирж байсан. Одоо ч тэр хэвээрээ.

-Өмнөх жилүүдэд ингэдэггүй байсан. Яагаад ачаалал гэнэт ингэж өсөв өө?
-Ачаалал өнгөрсөн жилийнхээс 3-4 дахин нэмэгдсэн. Урдаас оруулж ирж буй тоосго, цемент зэрэг барилгын материалын тоо хэмжээ бүр 10-20 дахин өссөн.

-Олимптой холбоотой юм болов уу. Ямар учиртай юм бол?
-Олимп үүнд хамаагүй байх. Бараа эргэлт, барилгын материалын хэрэгцээ эрс нэмэгдсэнтэй холбоотой болов уу.

Х.Болормаа