Үндэсний портал GoGo.mn танд үргэлж шинэ үйлчилгээг санал болгож байдаг билээ. Энэ удаа гар утсаараа интернэтэд холбогдох нэгэн шинэ боломжийг танд санал болгож байна. Интернэт хэмээх мэдээллийн хүчирхэг урсгалд орж, мэдээ мэдээллийн зуунтай хөл нийлүүлэн алхах нь шинэ зууны иргэн таны амьдралын чухал шаардлага болжээ. Харин GoGo.mn таны энэ шаардлагыг хаа яваа газарт тань хангах боломжийг бид олгож байна. Та алс хөдөө газар байхдаа ч, ажлынхаа хажууханд машин дотроосоо ч GoGo.mn-ийн цоо шинэхэн, түргэн шуурхай мэдээллийг авч, блогийн ертөнцөд хэн, юуны тухай бичсэнийг мэдэж байх болно.

Мобикомын хэрэглэгч Та гар утаснаасаа Үндэсний портал GoGo.mn-д хамгийн сүүлд орсон 20 мэдээ, 20 блогийн бичлэгийн товчийг мянган тэмдэгтээр унших юм. Ингэснээр цаг, хором бүрт шинэчлэгдэх мэдээллээс та аль ч тохиолдолд хоцрохгүй.

Харин үүний тулд Та “GoGo Уншигч” программыг гар утсандаа суулгах ёстой. Энэхүү үйлчилгээг авахын тулд таны гар утас:

1. Java MIDP 2.0 технологийг дэмждэг байх (сүүлийн үеийн бүх утас ийм боломжтой байдаг)

2. GPRS-ийн тохиргоог хийсэн байх /NOKIA загварын гар утас хэрэглэдэг бол Internet Access Point нэмэлт тохиргоог хийгдсэн эсэхийг шалгаарай/

Эдгээр тохиргоо хийгдсэн бол та гар утаснаасаа wap.mobicom.mn хаягаар орж 9060000 гэсэн кодоор хайлт хийн “GoGo Уншигч” программыг татаж аваарай. Программыг татаж авахад үнэ төлбөргүй, зөвхөн GPRS хэрэглээний төлбөр л төлөгдөнө. GPRS хэрэглээний төлбөр нэг кб нь 2 төгрөг байдаг. Таны утасны функцээс хамааран GoGo Уншигч программ нь утасны тань Menu, Applications, My own, Collections, Java world, Downloads зэргийн аль нэгэнд хадгалагдана.

Гар утсаараа GoGo.mn рүү нэвтэрч мэдээ мэдээллээс хоцрохгүй байх хамгийн сайхан боломж “GoGo Уншигч”.

GoGo.mn