АН-ын бүсгүйчүүд маргааш Төрийн ордонд "Лиш" нэртэй дээд чуулганаа хийх гэж байна. Энэ талаар өчигдөр тус намаас мэдээлэл хийв. Тэд "Лиш цэцэг" цэнгүүн зохион байгуулж, өнгөрсөн жилийн олон улсын эмэгтэйчүүдийн баярыг өөрсдөө дуулж бүжиглэн тэмдэглэсэн. Сонгуулийн тухай хуульд нам, эвслээс нэр дэвшигчдийн 30 хувь нь бүсгүйчүүд байх тухай заалт орсноор эл намын хүүхнүүд илүү "хөдөлгөөнд" орж, эр зориг, эрч хүчийг бэлгэддэг лиш цэцгээр улс төр дэх оролцоогоо урьдчилан тодорхойлсон билээ. Гэтэл уг заалт хуулиас хасагдаж, АН-ын дэргэдэх ардчилсан эмэгтэйчүүдийн холбоо бэлтгэсэн бүх бүсгүйгээ сонгуульд сойх боломжгүй болсон. Тэгсэн ч тэд зориг мохохгүй гэдгээ лиш цэцгээр билэгдсэн чуулганаараа харуулах аж. Энэхүү цэцгийн нэрийг тус намын бүсгүйчүүд брэнд болгон өмчилж буй гэнэ.

Чуулга уулзалтад тус намаас орон нутгийн төр, захиргааны байгууллагад ажиллаж буй 700 гаруй бүсгүй оролцох юм байна. Сум, дүүргийн ИТХ-д АН-ын гишүүн 620 орчим эмэгтэй ажилладаг бөгөөд Засаг дарга, Засаг даргын орлогчийн албан тушаалтантайгаа нийлэхээр 700 гардаг аж.

Бүсгүйчүүд энэ удаа улс төр дэх оролцоогоо хэрхэн нэмэх, орон нутгийн төр, захиргааны байгууллагуудыг яаж чадваржуулах, боловсон хүчнээ ямар аргаар сонгох талаар ажил хэрэгч зөвлөлгөөн хийхийг дуулж хуурдахаас илүүд үзжээ. Мөн намынхаа мөрийн хөтөлбөр, бусад асуудлаар санал солилцох юм байна.

С.Уул