Ерөнхий сайд Г.Занданшатар өнөөдөр /2025.07.22/ МҮЭХ-ны Ерөнхийлөгч Э.Тамир тэргүүтэй төлөөллийг хүлээн авч уулзлаа.

Шударга хөдөлмөрлөж, хичээн зүтгэж байгаа ажилтны ажлын үр дүнг үнэлгээний баг үнэлж, гүйцэтгэлээр нь урамшуулж, цалинжуулдаг байх, төрийн албаны аттестатчиллыг МҮЭХ, Төрийн албаны зөвлөлтэй хамтарч хэрэгжүүлэх саналыг Ерөнхий сайд тавилаа.

Мөн Хөдөлмөр, нийгмийн түншлэлийн гурван талт 2023-2025 оны улсын хэлэлцээрийг үнэлж, биелэлтийг дүгнэн энэ сарын 30-наас өмнө танилцуулахыг холбогдох албан тушаалтнуудад үүрэг болгов. 



Ерөнхий сайд, Сүүлийн үед гарч байгаа олон гэмт хэрэг, зөрчлүүдтэй холбоотойгоор Ерөнхий сайдын дэргэд Хүчирхийллийн эсрэг үндэсний зөвлөл байгуулагдаж байна. Энд Үйлдвэрчний эвлэл оролцож, бүх шатанд байгаа хүчирхийллээс сэргийлэх чиглэлээр ажиллах шаардлага үүсэж байна.  

Монгол хүний санаанд оромгүй аймшигтай хэрэг явдлууд гардаг боллоо. Тиймээс нийгмийг соён гэгээрүүлэхэд Үйлдвэрчний эвлэл манлайлж, хамтарч ажиллах шаардлагатай байна. Шударга бус байдлын эсрэг зөвхөн уриа лоозонгоор биш, бодит ажил хэрэг болгоход Үйлдвэрчний эвлэл татвар төлөгч хувийн хэвшлүүдийн оролцоог хангаж ажиллана гэв.