Иргэн Ш.Б өөрийн тэжээвэр нохойг зохих хамгаалалтгүй байлгажээ. Улмаар нохой нь хашаанаасаа гарч иргэн О.Н-ын баруун хөлийг хазаж, чирч түүний эрүүл мэндэд хүндэвтэр хохирол учруулсан байна.

Нохойн эзэн Ш.Б яллагдагчаар өгсөн мэдүүлэгтээ “...нохойгоо хашаандаа уяж орхиод Улаанбаатар хот руу явсан. Намайг эзгүй үед гинж нь тасраад манай нохой хөрш айлын хүнийг гудамжинд дайрч эрүүл мэндэд нь хохирол учруулсан. Би хийсэн хэргээ хүлээж байна. Хохиролд 800,000 төгрөг бэлнээр шилжүүлж, хохирлоо бүрэн барагдуулсан” гэжээ.

Харин хохирогч О.Н “...гудамжинд усны тэргээ түрээд явж байтал айлын хашаанаас том халтар нохой гарч ирээд над руу дайрсан. Нохой миний гутлаас хазаж татаад унагасан. Миний гутлаас зууж байгаад баруун талын хөлийг эргүүлсэн. Түүнээс бол шүдний ором орсон зүйл байхгүй” гэсэн байна.

Миний гутлаас зууж байгаад баруун талын хөлийг эргүүлсэн. Түүнээс бол шүдний ором орсон зүйл байхгүй.

Иргэн Ш.Б түүний эмчилгээний зардалд 800,000 төгрөгийг төлсөн тул хохирол төлбөр нэхэмжлээгүй аж.

Эрүүгийн хуулийн тусгай ангийн 20.15 дугаар зүйлийн 1 дэх хэсэгт орчиндоо аюул учруулж болох амьтныг зохих хамгаалалтгүй байлгасны улмаас хүний эрүүл мэндэд хүндэвтэр хохирол учруулсан бол эрүүгийн хариуцлага хүлээлгэхээр хуульчилжээ.

Иймд иргэн Ш.Б-г шүүхээс Эрүүгийн хуулийн тусгай ангийн 20.15 дугаар зүйлийн 1 дэх хэсэгт заасан "Орчиндоо аюул учруулж болох амьтныг зохих хамгаалалтгүй байлгасны улмаас хүний эрүүл мэндэд хүндэвтэр хохирол учруулах" гэмт хэрэг үйлдсэн гэм буруутайд тооцсон байна.

Улмаар Ш.Б-д 600 нэгжтэй тэнцэх хэмжээний буюу 600,000 төгрөгөөр торгох ял оногдуулж, энэ мөнгийг нэг сарын хугацаанд төлөхийг даалгажээ. Хэрэв торгох ялыг шүүхээс тогтоосон хугацаанд биелүүлээгүй бол торгох ялын арван таван нэгжтэй тэнцэх хэмжээний төгрөгийг нэг хоногоор тооцож, хорих ялаар солихыг мэдэгдсэн байна.