Шон "Дидди" Комбс өөрийнхөө шүүх хурал дээр байр сууриа илэрхийлж, мэдүүлэг өгөхгүй гэжээ.

Мягмар гарагт прокурорууд болон өмгөөлөгчдийн аль аль нь нотлох баримтаа танилцуулж дууссан бөгөөд хэрэв гэм буруутайд тооцогдвол Комбс бүх насаараа хоригдох ял хүлээж болзошгүй байна.

Шон "Дидди" Комбсыг бэлгийн мөлжлөг, зохион байгуулалттай гэмт хэргийн хэргээр буруутгаж буй хэргийнхээ хүрээнд зургаан долоо хоногийн турш хуучин найз бүсгүйчүүд нь, хувийн туслахууд, холбооны мөрдөгчид болон түүний нэгэн цагт нөлөө бүхий хэвлэл мэдээлэл, хөгжмийн эзэнт гүрний ажилтнуудаас мэдүүлэг авсан билээ.

Прокуроруудын үзэж буйгаар тэр гэмт хэргийн сүлжээ байгуулж бөгөөд хүмүүсийг албадан бэлгийн харьцаанд оруулах, бэлгийн мөлжлөг хийх зорилготой байжээ. Түүнийг мэдүүлэг өгөхгүй гэж мэдэгдсэний дараа өмгөөлөгчид нь нэмж гэрч дуудалгүйгээр тэр өдөртөө хэргийг дуусгасан байна. 

АНУ-ын дүүргийн шүүгч Арун Субраманиан түүнийг хэр байгааг асуугаад, мэдүүлэг өгөх эсэхийг лавлахад Комбс “Би сайн байна, эрхэм шүүгч ээ. Танд маш их баярлалаа. Та маш сайн ажиллаж байна” гэж хариулжээ. Мөн тэрээр өмгөөлөгч нартайгаа мэдүүлэг өгөх, өгөхгүй байх хоёрын давуу болон сул талуудыг нухацтай хэлэлцсэний эцэст гэрчийн суудалд гарахгүй байхаар шийдсэнээ илэрхийлжээ. Мөн тэр “Энэ бол миний шийдвэр, эрхэм шүүгч ээ. Зөвхөн миний шийдвэр” хэмээн тэр нэмж хэлсэн ба “Мэдээж өмгөөлөгчидтэйгөө зөвлөлдсөн ч эцсийн шийдвэрийг би өөрөө гаргасан” гэдгийг онцолжээ.

Шүүгдэгч мэдүүлэг өгөх эсэхийг шүүхийн танхимд шууд асуух нь албан ёсны үйл явц бөгөөд уг шийдвэрийг тэр өөрөө гаргаж буйг баталгаажуулах зорилготой юм.

Мөн мягмар гарагт Комбсын өмгөөлөгчид хэргийн нотолгоо хангалтгүй тул шүүх уг хэргийг хэрэгсэхгүй болгохыг хүссэн бөгөөд энэ нь эрүүгийн хэргүүдэд түгээмэл гардаг процессын нэг хэсэг юм. Шүүгч одоогоор энэ хүсэлтийн талаар шийдвэр гаргаагүй байна. Комбс нь бэлгийн мөлжлөг болон зохион байгуулалттай гэмт хэрэг зэрэг таван зүйл ангид буруугүй гэдгээ мэдүүлсэн бөгөөд Бруклиний хорих ангид баривчлагдсан хэвээр байна. 

Эх сурвалж: Hollywood Reporter