ОХУ-аас ирсэн оюутнуудын үдээс хойшхи шинжилгээний хариу 37 нь эерэг гарлаа. Ингээд нийт 98 тохиолдолтой болсон талаар ХӨСҮТ-ийн захирал Д.Нямхүү хэллээ. Одоогоор нийт 15 хүн эдгэрсэн бол ХӨСҮТ-д 83 хүн тусгаарлагдан, эмчлэгдэж байна. 

Өнөөдөр 11:00 цагийн мэдээллээр ОХУ-аас ирсэн нийт 18 оюутан, ХӨСҮТ-д тусгаарлалтад байгаа нэг хүн COVID-19 халдвартай хэмээн мэдээлсэн. Ийнхүү Оросоос ирсэн оюутнуудын үдээс хойшхи шинжилгээний хариутай нийлээд 55 нь халдвартай болохыг тогтоолоо.

"ОЮУТНУУДЫН 80 ХУВЬД НЬ ХӨНГӨН  ШИНЖ ТЭМДЭГ ИЛЭРЧ БАЙГАА УЧИР ТҮРГЭН ЭДГЭРНЭ"

Мөн өнөөдөр Турк улсаас манай улсын иргэд ирсэн. Цаашдын хүчин чадлын хувьд ярихад бид 250 ор бэлдсэн ба сэжигтэй тохиолдлуудыг хянах, халдвар илэрвэл эмчлэх бүрэн боломжтой. Голомттой улс орноос иргэдээ татаж авах нь зүй ёсных юм. Гурван саяхан иргэдтэй учраас элэг нэгтнээ халдварын голомтот улсаас бололцооныхоо хэрээр татан авах нь бидний үүрэг.

Халдвартай иргэд тусгаарлалтад байгаа учир иргэд санаа зовохгүй байж болно

Истанбулаас ирсэн хүмүүстээ шинжилгээ хийн хариуг маргааш 11:00 цагт мэдээлнэ. Мөн Энэтхэг, ОХУ-аас  Алтанбулагийн боомтоор ирэх иргэдээ бид тусгаарлан байрлуулах ажлуудыг нарийн тооцоолсон ба хойд хилээр орж ирэх хүмүүсээ нэг нэгээр нь байрлуулах өрөөнүүдийг бэлтгэсэн гэж ХӨСҮТ-ийн захирал Д.Нямхүү хэллээ. 

Мөн Засгийн газрын зүгээс бэлтгэл ажил, нөөцөд онцгойлон анхаарсан, өнгөрсөн таван сарын хугацаанд сайтар бэлтгэлтэй байснаас гадна халдвартай иргэд тусгаарлалтад байгаа учир иргэд санаа зовохгүй байж болно гэдгийг ЭМЯ-ны салбарын дарга Д.Нарангэрэл хэллээ. 

Одоогоор халдвартай оюутнуудын 80 хувьд нь хөнгөн хэлбэрийн шинж тэмдэг илэрч байгаа учир түргэн эдгэрнэ гэлээ.