Иргэдээс ирсэн гомдол мэдээллийн дагуу гуравдугаар сард Нийслэлийн мэргэжлийн хяналтын газраас “Сонгинохангай” компанийн “Миний дэлгүүр” сүлжээнд шалгалт хийж, багагүй зөрчил илрүүлсэн тул зөрчлөө арилгах сарын хугацаатай албан шаардлага өгчээ.

Энэхүү шалгалтын талаар НМХГ-ын Хүнс хөдөө аж ахуй үйлдвэр үйлчилгээний газрын хэлтсийн дарга О.Нарантуяа дараах мэдээллийг өглөө.

Ингээд дахин шалгалт хийхэд тус дэлгүүрүүд зөрчлөө арилгаагүй байжээ. Шалгалтанд төв болон 17 сүлжээ нийт 18 дэлгүүр хамрагдсан байна.

Тус дэлгүүрийн 15 нэр төрлийн төмс хүнсний ногоо, жимс жимсгэний чанарын баталгаажилтанд шалгалт хийхэд дөрвөн нэр төрөл нь лабораторийн шинжилгээнд хамрагдаагүй, ХУД-т байрлах “Миний дэлгүүр” сүлжээний 108-р салбарын барилгыг улсын комисст хүлээлгэн өгсөн актгүй байжээ.

Чингэлтэй дүүрэгт байрлах 366 дугаар дэлгүүр нь тоног төхөөрөмжийн цэвэрлэгээ ариутгал туйлын хангалтгүй, хугацаа дууссан бараа бүтээгдэхүүний тэмдэглэгээг хийгээгүй, БЗД-ийн 106 дугаар салбарт нь 20 нэр төрлийн бүтээгдэхүүнийг шинжилгээ баталгаажилтгүй худалдаалж байжээ.

БГД-т байрлах 355, 372, 373, СБД-ийн 330-р салбар “Миний дэлгүүр” сүлжээ тус тус шаардлага хангахгүй болон хугацаа нь дууссан бараа бүтээгдэхүүнийг борлуулж байсныг тогтоожээ.

Ингээд БЗД-ийн 106, ЧД-ийн 333, СБД 330 дугаар салбаруудын үйл ажиллагааг нь зогсоож, бусад зөрчил бүхий найман нэгж салбарт нь 2,2 сая төгрөгийн торгууль, таван албан хаагчид 200 мянган төгрөгний торгуулийг тус тус тавьсан байна.

Урин дулаан цаг ирсэнтэй холбогдуулан иргэдийг ил задгай зарж буй хүнсний бүтээгдэхүүнийг худалдан авахгүй байх, дэлгүүрээс бараа бүтээгдэхүүн авахдаа хаяг шошгыг нь сайтар харж байхыг Нийслэлийн мэргэжлийн хяналтын газраас анхаарууллаа.

М.Жаргал