Өнөөдөр /2022.11.08/ Дархан-Уул аймаг дахь "Оюуны ирээдүй" цогцолбор сургуулийн А байрны нэг давхарт хий цацагдаж, багш, сурагчид, сургуулийн ажилтнууд эмнэлэгт хүргэгджээ.

Тус хэргийн улмаас нийт 58 хүүхэд, зургаан хүнийг эмнэлэгт хэвтүүлээд байна. Үүнээс хоёр хүнийг эрчимт эмчилгээний тасагт хэвтүүлсэн бөгөөд тухайн хоёр иргэний нэг нь ухаан балартсан ярьж чадахгүй байдалтай, нөгөө нь үе мөч нь татаж, толгой нь хүчтэй өдвөх зовиур илэрч байгаа аж.

Эмнэлэгт хэвтсэн бүх хүмүүст зохих эмнэлгийн тусламж үзүүлж байна гэж Эрүүл мэндийн яамнаас мэдээллээ.

Дархан-Уул аймгийн Засаг даргын орлогч н.Жавхлан " "Оюуны ирээдүй" цогцолбор сургуулийн их завсарлагааны үеэр ахуйн газ цацагдсан байж болзошгүй гэдэг дуудлагыг анх өгсөн. Мэргэжлийн байгууллагууд бүгд ажилласан. Хэргийн газарт үзлэг хийж, шалгалтын ажиллагаа явагдаж байна. Миний авсан мэдээллээр ахуйн газ биш гэдэг нь тогтоогдсон. Урьдчилсан байдлаар тогтоогдсон мэдээллээр тухайн сургуулийн сурагчид нулимс асгаруулагч, амьсгал боогдуулагч цацсан байж магадгүй" гэсэн мэдээллийг өглөө.

Цагдаагийн ерөнхий газар: "Дархан сумын сургуулийн А байранд газ алдсан юм шиг байна" гэсэн мэдээллийг өнөөдөр 11:05-д авч шалгалтын ажиллагааг явуулахад тус сургуулийн 12 дугаар ангийн  сурагч эрэгтэй С, эмэгтэй Э нар нь БНХАУ д үйлдвэрлэсэн байж болзошгүй хаяг шошготой харуул хамгаалалтын зориулалт бүхий нулимс асгаруулагч гэх цацлага их завсарлагааны үеэр нэг давхарын цайны газрын кордиорт нэг удаа цацсан байдал нь камерийн бичлэг болон эд мөрийн баримтыг хогийн саванд хаяснаа өөрсдөө зааж өгсөн байдлаар тогтоогдсон.