2019 онд улсын хэмжээнд нийт эрчим хүчний 91 хувийг Дулааны цахилгаан станцууд үйлдвэрлэсэн байна. Дулааны II, III, IV цахилгаан станц өнгөрсөн өвлийн оргил ачааллын 72.5 хувийг дангаараа хангажээ.

Эдгээр нь Монголын Хөрөнгийн биржид бүртгүүлээд 20 орчим жил болж буй, III ангилалд бүртгэлтэй Төрийн өмчит хувьцаат компаниуд юм. 2004 онд Монголын Хөрөнгийн биржид бүртгүүлсэн Дулааны IV цахилгаан станцын цэвэр ашиг 2020 оны эхний хагаст 6.37 тэрбум төгрөг байсан нь 2019 оны эхний хагас жилтэй харьцуулахад гурав дахин буурсан үзүүлэлт болж байгаа юм.

2003 онд Монголын Хөрөнгийн биржид бүртгүүлсэн Дулааны III цахилгаан станцын тухайд 2020 оны II улирлын байдлаар 4.7 тэрбум төгрөгийн ашигтай ажиллажээ. Дулааны II цахилгаан станц 2019 оны жилийн эцсээс хойш тайлангаа Монголын Хөрөнгийн биржид ирүүлээгүй байна. Сүүлийн тайлангаас харахад 2019 онд 314 сая төгрөгийн ашигтай ажилласан байгаа юм. Эдгээр компаниуд нь Монголын Хөрөнгийн биржид бүртгэлтэй ч одоо хүртэл хувьцаа нь эргэлтэд орж, хөдлөөгүй буюу ТӨХК хэвээр байгаа аж.

Монголын Хөрөнгийн биржийн Гүйцэтгэх захирлын мэдээлснээр анх өмч хувьчлалын үеэр бүртгэж авсан хэд хэдэн компаниудын идэвх сул, тайлагнал муу байгаа учраас зарим компаниудыг Монголын Хөрөнгийн биржийн бүртгэлээс хасах тухай хэлэлцэж байгаа ч үүнд ТӨХК-иуд хамаарахгүй юм байна. Учир нь цаашид Дулааны цахилгаан станцууд дотоодоос хөрөнгө татаж, хувьчлагдах магадлалтай гэж мэдээллээ.

Б.Дөлгөөнзул