Улаанбаатар хотод үйл ажиллагаа явуулдаг их, дээд сургуулиуд өчигдөр элсэлтээ үргэлжлүүлэн авч эхэллээ. Хөдөө орон нутагт элсэлт үргэлжилсээр байгаа. Харин Завхан, Говь-Алтай аймагт их, дээд сургуулиудын эл­сэлтийг наадмын дараа явуу­лахаар болжээ. Энэ нь тухайн аймгуудад очиж ажиллах эл­сэлтийн комиссынхны унаа тэрэгний асуудалтай холбоо­той хэмээн мэргэжлийн бай­гууллагынхан хариулж байгаа юм. Элсэлт хичнээн хоног үргэлжлэх нь тухайн сургуу­лиудаасаа хамааран янз бүр байгаа аж. МУИС өнөө жил 881 оюу­тан шинээр элсүүлэхээр болсон байна.

Эдний бүртгэл өглөөний 10.00 цагаас оройн 17.00 цаг хүртэл явагдаж өнөөдөр өндөрлөнө. Тус сур­гууль элсэхээр ирсэн бүхнийг бүртгэхгүй байгаа аж. Учир нь элсэлтийн ерөнхий шалгал­тад шалгуулагчдын дундаж оноог харгалзан бүртгэлийн босго оноо тогтоожээ. Тухайн элсэгч Монгол Улсын түүхийн хичээлд 561-ээс дээш оноо авсан бол энэ сургуульд бүртгүүлэх болзол хангах аж.

Харин тус сургуулийн Олон улсын харилцааны сур­гуульд суралцах хүсэлтэй бол англи хэлний шалгалтын оноо 800 байх шаардлагатай юм байна. Үүний дараа тухайн мэргэжилд харгалзах хичээ­лүүдийн шалгалтын нийлбэр онооны дарааллаар БСШУЯ-наас баталсан хяналтын тоонд багтаан оюутнуудаа авах юм байна. Хэрэв нэг ангид элсэх хоёр хүүхдийн ерөнхий шалгалтын оноо тэнц­сэн тохиолдолд голлох хичээлийн шалгалтын оноог нь харьцуулах юм байна. Тэдгээр нь мөн адилхан бай­гаа бол аттестатын дүнгээр шийдвэрлэх гэнэ.

Хүмүүнлэгийн ухааны их сургуулийн элсэлт энэ сарын 9-нийг дуустал үргэлжлэх юм байна. Эдний босго оноо 500 байгаа аж. Харин ШУТИС-ийн бүртгэл өчигдөр эхэлсэн бө­гөөд гурван өдөр үргэлжилнэ. Тус сургуульд элсэгчдийн босго оноо 400 юм байна. Элсэгч­дийг ерөнхий шалгал­тад ав­сан онооны дараал­лаар жаг­саах юм. Мөн тухайн мэргэж­лийн хичээлүүдээр нь таван бүлэгт хувааж тэдгээ­рийн шалгалтын онооны нийл­бэ­рийг харгалзах аж. Ту­хайлбал, нэгдүгээр бүлэгт голлох хи­чээл нь математик бол да­галдах хичээл нь физик юм байна. Тиймээс ерөнхий шалгалтад математикийн хичээлээр 700, физикийн­хэнд 400 оноотой хүүхэд дунджаар 900 оноо авч ШУТИС-д элсэх болзол хан­гаж байгаа гэнэ. Ер нь эл­сэгчид голлох хичээлийн шалгалтдаа авах ёстой оноо­ны 100 хувийг авсан байх хэрэгтэй юм байна. Харин дагалдах хичээлийн шалгал­тын авах ёстой онооны 50 ху­вийг авсан тохиолдолд хан­галт­тай гэж ШУТИС-ийнхэн үзэж байгаа аж. Дээрх нөх­цө­лүүдийг хангаж тус сур­гуульд элс­сэн оюутнууд энэ сарын 16-17-нд мэргэжлийн хуваарь сонголтоо хийхээр болжээ. Их, дээд сургуульд элсэгчид бүртгүүлэхдээ да­раахь мате­риа­луудыг бүр­дүүлэх аж. Ерөнхий шалгал­тын батламж хуу­дас, өргөдөл, иргэний үнэмлэх, гурван хувь цээж зу­раг, боловс­ролын гэрчил­гээ, бүртгэлийн хураамж 3000 төгрөг авчрах шаардлагатай гэнэ. Нэг сур­гуу­лийн өөр, өөр факультетэд бүртгүүлэхдээ материалаа тус бүрт нь бүр­дүүлэх юм байна.

Я.Мөнгөнцэцэг