Өнгөрсөн бямба гаригт GoGo мэдээний агентлагийн сурвалжлах баг Харзтай амралтын зүг хөдөлсөн юм. Энэ амралтад 2010 оноос хойш бэлтгэлээ базааж буй “Увс нуур” галын бөхчүүд байрлан бэлтгэл, сургууль хийж байгаа билээ.

Тус галын бөхчүүдийг улсын арслан Б.Ганбат анх удаа ахлан гарч байгаа бөгөөд өмнө нь улсын гарьд Б.Гантогтох ахалдаг байжээ. 70 гаруй бөх бэлтгэлд гарсан энэ галынхан мөн л наадмаа хийж, сорилго барилдаан зохион байгуулж байхтай бид таарсан юм.

Улсын арслан Б.Ганбат:

Наадам хаяанд ирлээ. Өнөөдөр наадмын сорилго барилдаан болж байна. Сэрүүн дэнж гэдэг энэ газарт 19 жилийн өмнө анх ирж наадмын бэлтгэлд гарч байлаа. Тэр цагаас хойш тасралтгүй энд бэлтгэлд гарч байна. Өнгөрсөн жилийн есдүгээр сард Увс аймгийн бөхийн галын дасгалжуулагчийн ажлыг авсан даа. Өөрөө ч гэсэн зодоглохыг бодож байна” гэсэн юм.

Галын наадамд Увс, Сэлэнгэ, Баян-Өлгий аймгууд болон ОХУ-ын Тува улсын нийт 80 бөх барилдаж, улсын аварга С.Мөнхбат түрүүлсэн бол аймгийн арслан Н.Жаргалбаяр үзүүрлэлээ.

Гэрэл зургийг Д.Жавхлантөгс