АНУ-ын ерөнхийлөгч асан Жо Байден суудлаасаа бууснаас хойш анх удаа олон нийтийн өмнө гарч үг хэлэхдээ Дональд Трампын засаг захиргааг шүүмжлэв.

Тэрбээр “Одоо юу болоод байгааг хар даа. 100 ч хүрэхгүй хоногийн дотор шинэ засаг захиргаа асар их хохирол, сүйрэл авчирлаа. Энэ бүхнийг ийм хурдан хугацаанд хийж чадаж байгааг гайхаж байна” гэжээ.

Байден Трампын нэрийг шууд дурдаагүй ч холбооны засгийн газарт хийгдэж буй цомхотгол, бодлогын өөрчлөлтүүдийг шүүмжилсэн юм. 

"Тэд Нийгмийн хамгааллын яамны 7000 ажилтныг халаад байна. Тэдний дунд хамгийн туршлагатай мэргэжилтнүүд ч байсан. Тэд дахин хэдэн мянган хүнийг халахаар зэхэж байна. Үүний үр дагавар ил болж эхэлсэн. 

Тухайлбал өдөр бүр мянга мянган хүн Нийгмийн хамгааллын яамны вэбсайтад нэвтэрч, тэтгэврийн мэдээллээ шалгаж, хүсэлт гаргаж байна. Гэтэл энэ байгууллагын технологийн хэлтсийн талыг нь цомхотгосноос болж вэбсайт байнга гацаж байна.

Та өөрийгөө ганцаараа амьдардаг, 74 настай эмэгтэй гээд төсөөл дөө. Тэтгэмжийнхээ мэдээллийг шалгах гэсэн ч вэбсайт нь ажиллахгүй, шинээр өргөдөл ч өгч чадахгүй байна. Эдгээр нь нөхцөл байдлыг улам хүндрүүлж байна" хэмээн ярилаа. 

Эх сурвалж: Reuters