Орон нутгийн сонгууль ирэх сарын 11-ний баасан гарагт болно. Энэ жилийн сонгууль ширүүн болох шинжтэй. Хотын дарга Х.Нямбаатар энэ сарын 8-нд "Би өнөөдрөөс эхлэн өдөр бүр Женкод хандаж, мэдэгдэл хийнэ” гэсэн юм.

Мөн энэ сарын 11-нд машин дотроосоо дахин лайв хийж, Ерөнхийлөгч асан Х.Баттулга, УИХ-ын дарга, ЕТГ-ын дарга асан З.Энхболд нарыг хулгайч, луйварчид гэв.

Хамгийн хачирхалтай нь хотын дарга “Намайг хашлаганы мафийн эзэн болгох гэж байгаа бол хэдүүлээ хамтдаа үүнийг зогсооё. Авто зам шинэчлэлийг өнөөдрөөс зогсоож, хуулийн байгууллагад шалгуулах, эсэх талаар санал асуулга явуулна. Та бүхэн санал асуулгад идэвхтэй оролцоорой” гэсэн юм.

Иргэдийн дийлэнх санал асуулгад “ҮГҮЙ” гэж хариулбал нийслэлд эхэлсэн болон эхлэх зам засваруудыг зогсоохоо хотын дарга мэдэгдсэн.

2024.09.11-ний 12.00 цагт эхэлнэ хэмээсэн санал асуулгад хэдэн хүн оролцов, ямар хариулт өгөв?

Ulaanbaatar.mn сайт руу нэвтрэхэд системийн алдаа зааж, санал асуулгад оролцох боломжгүй байна. Гэхдээ 1551 иргэн санал өгч, дийлэнх нь зам засварыг зогсоохыг дэмжээгүй байна. 

Тэгэхээр хотын дарга Х.Нямбаатарын хүссэнээр болсонгүй.

Хотын даргыг Ерөнхий сайд, эрх баригч намын удирдлагууд томилдог. Энэ утгаараа улс төрийн албан тушаалтан. Гэвч 1.5 сая хүн амьдардаг их хотыг удирдаж буй хүн орон нутгийн сонгуулийн өмнө, сөрөг хүчнээ намнахын тулд зам засварыг зогсоох нь зөв үү? 

Намайг ингэж гүтгэлээ, над руу ингэж довтоллоо гээд гомдоллож, уурлаад арай гэж эхлүүлсэн ажлуудаа зогсоогоод байвал цаашид юу болох вэ? Дагаад дүүргийн дарга нар нь мөн ажлаа хаях юм биш биз?  Увайгүй нь, тэрээр улс төрийн нүүдэлдээ иргэдийг татан оролцуулж, тэдний саналд үндэслэн шийдвэрээ гаргана гэв.   

Азаар Х.Нямбаатарт зөвлөхүүд нь улс төрийн болон хотын ажлаа ялгаж салга гэж зөвлөв үү, ямартаа ч санал асуулгыг хаажээ. Тэгэхээр хашлаганы улмаас хэл ам болж буй зам засварууд зогсохгүй.

ХОТЫН ДАРГА ЯМАР ЭРХ, ҮҮРЭГТЭЙ ВЭ?

Монгол Улсын нийслэл Улаанбаатар хотын эрх зүйн байдлын тухай хуульд зааснаар хотын даргын чиг үүрэгт дараах заалтууд багтжээ.

• 8.2.7. Нийслэлийн тусгай чиг үүргийг хэрэгжүүлэхэд шаардлагатай барилга байгууламж, авто зам, нийтийн эзэмшлийн зам талбай, ногоон байгууламж, гэрэлтүүлэг болон бусад дэд бүтцийн засвар, арчлалт, цэвэрлэгээ, үйлчилгээ, хамгаалалтыг хариуцах
• 8.3.3. орчны аюулгүй байдлыг хангах
• 8.3.6. нийслэлийн авто замын арчлалт, засвар, төлөвлөлт, хяналт

Гэхдээ хотын дарга Х.Нямбаатар та Үндэсний аудитын газар, АТГ-аар хашлаганы төсөв нийцэж буй эсэхийг, зам засах бүх процесс төрийн худалдан авах ажиллагаанд нийцсэнийг шалгуулна гэсэн амлалтдаа заавал хүрээрэй. АН-ынхнаас гадна ард иргэд ч үүнийг чих тавин сонсоно.   

Нийслэлд нэг зэрэг 87 замын ажил эхэлсэн нь анхны тохиолдол юм билээ. Гэвч дөнгөж 27 нь л эхэлжээ. 60 замын засвар яагаад эхлээгүйг ч хотын иргэд бид мэдмээр байна. Эдгээрээс хэдэн замын тендерийг зарлаж, хэдийнх нь тендерт маргаан гарав?  

Одоо эхлээгүй гэхээр ирэх хавар л 60 замыг засах нь ээ.