АНУ-ын ерөнхийлөгч Дональд Трамп улсынх нь бараанд татвар ногдуулдаг 180 гаруй улсад хариу татварын арга хэмжээ авахаа зарласан.

Өөрөөр хэлбэл АНУ-ын бараанд ногдуулдаг татварынх нь талтай тэнцэх хэмжээгээр эргүүлэн тухайн улсад ногдуулна гэж танилцуулав. Ингэхдээ АНУ-д бараа бүтээгдэхүүн импортлох улсуудад суурь 10 хувийг ногдуулна.

Түүний уг шийдвэрт хамгийн хүндээр өртөх улсууд нь үйлдвэрлэл, экспортоос өндөр хамааралтай Азийн орнууд байна. Тухайлбал

• БНХАУ-д өмнө нь тогтоосон байсан 20+34 буюу нийт 54 хувь
• Камбожид 49 хувь
• Вьетнамд 46 хувь
• Тайландад 36 хувь
• Тайвань, Индонезид 32 хувь
• Өмнөд Солонгост 25 хувь
• Японд 24 хувийн хариу татварыг тус тус ногдуулна гэсэн жагсаалтыг танилцуулсан. 

Трамп энэ шийдвэрээ танилцуулсны дараа Ази дахь голлох хувьцааны индексүүд уналттай байна. Тухайлбал Хонконгийн Ханг Сенг 1.2, Токиогийн Никкэй 225 2.9, БНСУ-ын Коспи 1.7 хувиар тус тус унажээ. 

Энэ татвараа цуцлахыг БНХАУ-ын талаас АНУ-д уриалж буй бөгөөд өөрийн ашиг сонирхлыг хамгаалахын тулд хариу арга хэмжээ авахаа мэдэгдээд байна.

Эх сурвалж: ВВС