Нийслэлээс “Зогсоол” хөтөлбөрийг хэрэгжүүлнэ Засаг дарга Х.Нямбаатар өнөөдөр /2025.04.04/ мэдэгдлээ.

Тэрбээр, Хотын хүн амын нягтшил ихсэхийн хэрээр зогсоолын хүрэлцээ бидний өдөр тутмын томоохон асуудлын нэг болоод байна. Хуучин нийгмийн үед баригдсан хотхон, хорооллуудад далд зогсоол гэж байхгүй. Гадна талбайд төлөвлөсөн хэдхэн зогсоол нь хаанаа ч хүрдэггүй. Шинээр ашиглалтад орж байгаа байр хотхонууд ч мөн ялгаагүй шахуу.

Үүнээс болоод хот маань хүнд биш машинд зориулсан хот болж хувирлаа. Хотхон, хорооллын дундах замуудын хашлага давуулж машинаа тавьдаг, тэргэнцэртэй иргэд, хүүхдийн тэрэг түрсэн хүн байтугай хажуугаар нь зүгээр зөрөхөд ч төвөгтэй нөхцөл байдал хаа сайгүй.

Худалдаа үйлчилгээний байгууллагууд хүртэл зогсоолгүйн улмаас худалдаачид өөрсдөө өглөө зогсоолдоо машинаа байрлуулаад орой гардаг. 3, 4-р хороолол, Хүүхдийн 100 орчмын үйлчилгээний байгууллагуудын зогсоолын сэлгэлт маш муу.

Энэ мөн л бидний төлөвлөлтийн алдаа. Авто машины өсөлтийг тооцоогүйн уршиг. Дээрх нөхцөл байдлаас үүдээд гадна тохижилт, ногоон байгууламж, амрах салхилах талбай байтугай эвтэйхэн алхах явган зам барихад ч хүндрэлтэй байна. Тиймээс боломжит зай, талбайг судалж, далд зогсоол байгуулах ажлыг эрчимжүүлнэ.

Ингэж байж гэрийнхээ гадаа машин дундуур сүлждэг биш аажуу тайван явган замаар алхдаг, ногоон байгууламжтай орчинд амраад суудаг орчин бүрдүүлнэ.

Урт цагааны буурин дээр 200 машины далд зогсоол 7-р сарын 1-нээс ашиглалтад орно. Энэ зогсоол ашиглалтад орсноос хойш ЧГД-ийн ЗДТГ, Тээврийн цагдаагийн газар тэр орчимд нэг ч машиныг замын хашлага давуулах болох нэгдүгээр эгнээнд зогсоохгүй. Журамлаж цэгцлэх ажлуудыг явуулна. 

Машин унаж яваа хүмүүс зогсоолын төлбөрөө төлж, хөдөлгөөнд соёлтой оролцох ёстой. Улаанбаатар хотын стандартад тавигдсан тээврийн хэрэгслээр хөдөлгөөнд оролцох ёстой. Хотод машин уная гэвэл зогсоолын төлбөр төлдөг соёлд суралцах хэрэгтэй гэлээ.