“Хорт бодис ихтэй 12 хүнс” жагсаалтыг Байгаль орчны ажлын хэсэг (EWG) хэмээх эрүүл мэндийг дэмжигч байгууллага АНУ-ын төрийн байгууллагын хамгийн сүүлийн үеийн мэдээлэлд үндэслэн жил бүр гаргадаг ба 2004 оноос хойш тайланг гаргаж байна.

2025 оны жагсаалтад хамгийн их хорт бодис илэрсэн хүнсээр бууцай тодорчээ. Дараагаар нь гүзээлзгэнэ, салатны навч буюу навчит ногооны төрөл, усан үзэм, тоор, интоор, чавган тоор, лийр, алим, үхрийн нүд, нэрс болон төмс оржээ. 2025 оны “Жимс, хүнсний ногооны талаарх хэрэглэгчийн гарын авлага”-д дурдсанаар, шинжилгээнд хамрагдсан жимс, хүнсний ногооны дээжийн 90 гаруй хувь нь хүний эрүүл мэндэд аюултай хорт бодисын үлдэгдэлтэй байна гэжээ. 

EWG-ийн шинжлэх ухааны дэд ерөнхийлөгч Алексис Темкиний хэлснээр, уг жагсаалт нь жимс, хүнсний ногоо идэхийг болиулах зорилготой биш харин хэрэглэгчдэд гэр бүлийнхэн нь хамгийн их хэрэглэдэг хүнсний төрлийг органик эсэхийг сонгоход туслах мэдээлэл өгөх зорилготой аж. “Энэ гарын авлага нь иргэдийг жимс, хүнсний ногоогоо идсээр байхыг дэмжиж буй ч хорт бодисын хэрэглээг багасгахыг зорьж буй юм” хэмээжээ. Эрдэм шинжилгээний олон судалгаагаар батлагдсанаар, ердийн хүнсний хэрэглээнээс органик руу шилжихэд хүний шээснээс илэрдэг хорт бодисын түвшин мэдэгдэхүйц буурдаг байна.

Шавж устгалын хорт бодис буюу пестицидийн эрсдэлүүд

• дутуу төрөх, зулбах,
• мэдрэлийн гуурсан согог зэрэг төрөлхийн гажиг,
• хүний генийн гэмтэл ихсэх,
• эр бэлгийн эсийн тоо багасах,
• зүрхний өвчин,
• хорт хавдар зэрэг олон төрлийн өвчлөлийн шалтгаан болох эрсдэлтэй байдаг.

Эх сурвалж: CNN, www.ewg.org