Урин дулаан цаг ирж, унадаг дугуйгаар замын хөдөлгөөнд оролцох иргэдийн тоо нэмэгдэв. Гэтэл цахим сүлжээнд “Дугуйгаа хулгайд алдчихлаа, цагдаа нар хулгайчийг илрүүлсэнгүй, араас нь хөөцөлдсөнгүй гэж гомдол мэдүүлсэн иргэд цөөнгүй.

Дугуйгаа алдсан иргэн Б.Э "Манай хүүхэд дугуйгаа орцныхоо үүдэнд орхидог. Орой орхиод өглөө алга болсныг мэдээд цагдаад өргөдөл өгсөн. Гэвч цагдаа нар ийм хэргийг тоодоггүй билээ. Манай хотхонд ирж, СӨХ-ийн камерийг шүүгээгүй.

Би өөрөө шүүж үзтэл манай СӨХ-ийн камерууд хар цагаанаар л бичдэг тул хүний царайг ялган таних ямар ч боломжгүй. Орц бүрийн үүдэнд камергүй юм билээ. Би олон жил энэ хотхонд амьдарсан ч ийм гэдгийг нь мэдээгүй. Харуул хамгаалалт сайн гэж бодож явдаг ч тийм биш байсан.

Хулгайч нар хаана камер байрлуулсныг маш сайн мэддэг юм билээ. Байрны ард камер огт байрлуулдаггүй тул хулгайч байрны араар явсан байсан. Цагдаа нар цахим сүлжээний "Хуучин дугуй зарна" гэсэн заруудыг анхаар, танай дугуйг худалдах зар харвал хэлээрэй" гэсэн. Тэгээд удалгүй хэргийг хаалаа, таны гомдлыг шалгасан гэж мессеж илгээгээд л орхидог. Түгжрэл маш их болсон үед уг нь дугуйгаар явбал өөрт амар, өрөөлд ч төвөг болохгүй. Гэтэл нэг сая төгрөгөөр авсан дугуйгаа алдчихсан" гэв.    

Энэ талаар ЦЕГ-ын Хэвлэл мэдээллийн төвийн мэргэжилтэн, цагдаагийн ахмад Э.Энхзаяагаас тодрууллаа.

-Унадаг дугуйгаа хулгайд алдсан хэчнээн тохиолдол бүртгэгдсэн бэ?                               
-Нийслэлийн хэмжээнд унадаг дугуйгаа хулгайд алдсан иргэдийн тоо хоногт 2-3 тохиолдол бүртгэгдэж байна.

-Энэ төрлийн хэргийг цагдаагийн байгууллага хэрхэн илрүүлдэг вэ?                             
-Хяналтын камерын бичлэг шүүн, сэжигтэй этгээдийг тогтоодог. Дараа нь эрэн сурвалжлах ажиллагаа шуурхай байх зарчмын дагуу ажилладаг. Цагдаагийн байгууллага иргэдийн алдагдсан эд зүйлсийг шуурхай хүлээлгэн өгөх зорилготой. Иймд тодорхой хугацаа амлах боломжгүй байдаг.

Иргэд унадаг дугуйгаа харуул хамгаалалттай, хяналтын камертай бүсэд байршуулж, бат бөх, сайн чанарын түгжээг хэрэглэвэл энэ төрлийн гэмт хэргээс урьдчилан сэргийлж, эд хөрөнгөө хамгаалах бүрэн боломжтой.” гэв.

ЗӨВЛӨМЖ: Иргэд та бүхэн орцныхоо доор дугуйгаа байршуулах бол эргэн тойронд камер бий эсэх, байсан ч ажилладаг эсэхийг СӨХ-өөсөө тодруулаарай. Мөн илүү бат бөх цоож сонговол хулгайч таны дугуйг авч явж чадахгүй. Тэд голдуу бахь ашиглан дугуйн цоожийг эвддэг аж.