2024 оны АНУ-ын Ерөнхийлөгчийн сонгуулийн санал хураалт АНУ даяар энэ сарын 5-ны өдөр эхэлсэн. Одоогийн байдлаар зарим мужид санал хураалт хаагдаж, урьдчилсан байдлаар аль нэр дэвшигч хэдэн санал авсан нь гараад байна.
Бүгд найрамдах намаас нэр дэвшсэн Дональд Трамп Индиана болон Кентакки мужуудын саналыг авах төлөвтэй байгаа бол Ардчилсан намаас нэр дэвшигч Камала Харрис Вермонт мужид олонхийн санал авчээ. Эдгээр мужид санал хураалтын тооллого 50 хувьтай үргэлжилж байна.

АНУ-ын Ерөнхийлөгч ард түмнээс сонгогддог гэдэг ч ард түмний шууд саналаар тодордоггүй. Ерөнхийлөгч болон дэд ерөнхийлөгчийг хосоор нь мужууд болон тэдний бүрдүүлсэн сонголтын төлөөлөгчдийн саналаар /Electoral College/ сонгодог.

Тухайн мужид хамгийн олон санал авсан нэр дэвшигч тэр мужийн нийт төлөөлөгчийн саналыг авах эрхтэй болно. Нийт 50 мужийн 538 төлөөлөгчийн 270-аас дээш саналыг авсан нэр дэвшигч Ерөнхийлөгч болно.

Муж тус бүрийн сонгуулийн төлөөлөгчийн тоо өөр бөгөөд улс даяар хамгийн олон санал авсан ч сонгуулийн төлөөлөгчийн олонхийг авч чадаагүй бол ялалт байгуулах боломжгүй гэсэн үг юм.
Electoral College нь мужийнхаа намуудаас сонгогдсон, бүх нийтийн санал хураалтын үр дүнгийн дагуу санал өгөхөөр амласан хүмүүс байдаг. Сонгуулийн системийн дагуу төлөөлөгчид мужийн иргэдийн олонх хэнд санал өгсөн байна, тэр дагуу сонголт хийх ёстой. 

Хэрэв Ерөнхийлөгчид нэр дэвшигчдийн хэн нэгэн нь ялж чадалгүй тэнцвэл Ерөнхийлөгчийг Конгрессын төлөөлөгчдийн танхим сонгодог.

Эх сурвалж: АР, ВВС

Дональд Трамп үр дүнд чухал нөлөө үзүүлэх Флорида мужид саналаар илүүрхэж байна.

АНУ-ын Ерөнхийлөгчийн сонгуулийн санал хураалтын тооллого үргэлжилж байна. Сонгуулийн үр дүнд чухал нөлөө үзүүлэх мужуудын нэг болох Флорида мужид ялалт байгуулбал төлөөлөгчийн 30 саналтай болно.

Флорида мужийн саналын 94 хувийг тоолсон байгаа бөгөөд урьдчилсан байдлаар Дональд Трамп сая гаруй саналаар илүүрхэж байна.

Урьдчилсан дүнгээр Трамп 230, Камала 210 санал аваад байна

Сонгуулийн үр дүнгүүд гарсаар байна. Урьдчилсан байдлаар Бүгд найрамдах намаас нэр дэвшигч Дональд Трамп 230 төлөөлөгчийн санал, Ардчилсан намаас нэр дэвшигч Камала Харрис 210 төлөөлөгчийн санал авчээ.
Энэ сонгуульд ялахын тулд 270 ба түүнээс дээш төлөөлөгчийн саналыг авах ёстой. Сонгуулийн үр дүнд чухал нөлөө үзүүлэх мужууд:

• Жиоржиа /16 санал/: Саналын 94 хувийг тоолсон. Трамп илүүрхэж байна.
• Пенсильвани /19 санал/: Саналын 88 хувийг тоолсон. Трамп илүүрхэж байна.
• Мичиган /15 санал/: Саналын 57 хувийг тоолсон. Трамп илүүрхэж байна.
• Аризона /11 санал/: Саналын 51 хувийг тоолсон. Трамп илүүрхэж байна.
• Висконсин /10 санал/: Саналын 84 хувийг тоолсон. Трамп илүүрхэж байна.  
• Хойд Каролина /16 санал/: Саналын 96 хувийг тоолсон. Трамп илүүрхэж байна.
• Невада /6 санал/: Саналыг тоолж эхлээгүй байна.

Трамп хоёр чухал мужид ялалт байгуулах нь тодорхой боллоо

Дональд Трамп Хойд Каролина, Жиоржиа мужуудад ялалт байгуулах нь тодорхой боллоо. Ингэснээр Ардчилсан намаас нэр дэвшигч Камала Харрист нөхцөл байдал хүндхэн болж ирэв.

Санал хураалтад гол нөлөө үзүүлэх долоон мужийн санал хураалтаар үр дүн ер нь тодорхой болно гэж үздэг. Үүний хоёрт нь Трамп ялаад байна. Одоогоор Трамп 247, Камала 214 санал авчээ.
Камала Харрис Пенсильвани мужид ялалт байгуулахгүй л бол энэ сонгуульд Трамп ялах нь бараг тодорхой болно хэмээн Ройтерс агентлаг мэдээлж байна. Тус муж 19 төлөөлөгчийн саналтай. Одоогийн байдлаар саналын 91 хувийг тоолсон бөгөөд Трамп илүүрхэж байгаа юм.

Энэ удаагийн сонгуульд Дональд Трамп бараг бүх мужид дөрвөн жилийн өмнөхөөс хамаагүй олон санал авчээ.

Трамп Пенсильвани мужийн 19 саналыг авснаар ялалтад ойртож ирлээ

Сонгуулийн санал тооллого үргэлжилж байна. Ихэнх мужийн саналыг тоолж, үр дүнгүүд эхнээсээ тодорхой болсон.

Үр дүнд гол нөлөө үзүүлэх чухал мужуудын нэг гэгддэг Пенсильвани мужийн 19 төлөөлөгчийн саналыг Трамп авах нь тодорхой болсноор Ерөнхийлөгчийн сонгуулийн ялалтад тун ойртож ирлээ.

Түүний санал одоогийн байдлаар 267 байгаа бөгөөд 270 ба түүнээс дээш төлөөлөгчийн санал авсан нэр дэвшигч Ерөнхийлөгч болно.
Одоогоор санал тоолж буй долоон муж байгаагаас тавд нь Трамп илүүрхэж буй. Харин Миннесота, Мэйн мужуудад Камала Харрис саналын тоогоор тэргүүлж байгаа юм.

Fox мэдээллийн агентлаг урьдчилсан байдлаар 2024 оны Ерөнхийлөгчийн сонгуульд Бүгд найрамдах намаас нэр дэвшигч Дональд Трамп ялсан гэж үзэж буйгаа мэдээлсэн.

• Илон Маск Пенсильвани мужийн сонгогчдод өдөр бүр $1 сая өгнө гэжээ

Дональд Трамп ялалтаа зарлалаа

АНУ-ын Ерөнхийлөгчийн сонгуульд Бүгд найрамдах намаас нэр дэвшигч Дональд Трамп саяхан иргэдэд мэдэгдэл хийлээ. Энэ үеэр тэрбээр өөрийн ялалтыг зарлав.

Гэхдээ бүх саналыг тоолж дуусаагүй бөгөөд нэгдсэн байдлаар сонгуулийн дүн гараагүй. Одоогоор Трамп 267 төлөөлөгчийн санал, Камала 224 төлөөлөгчийн санал цуглуулжээ.
Fox News-ээс түүнийг сонгуульд ялсан хэмээн мэдээлээд буй. Харин бусад томоохон хэвлэл мэдээллийн хэрэгслүүд Трампыг ялсан гэж хараахан мэдээлээгүй байна.  

Урьдчилсан дүнгээр олон төлөөлөгчийн саналтай, чухал мужуудын гуравт нь Трамп ялалт байгуулсан. Үлдсэн мужуудын саналыг тоолж буй бөгөөд Трамп илүүрхэж буй.

Хэрэв энэ байдлаар санал хураалтын үр дүн үргэлжилбэл сонгуульд Дональд Трамп ялах нь тодорхой болж байна.

Тэрбээр “Энэ бол гайхалтай ялалт. Бурхан миний амийг аварсан нь шалтгаантай байж” хэмээгээд өөрийг нь дэмжсэн Илон Маскийг мөн мэдэгдлийнхээ үеэр магтжээ.

• ​Дональд Трамп сонгуулийн сурталчилгааны үеэр буудуулжээ

АНУ-ын Ерөнхийлөгчийн сонгуульд Бүгд найрамдах намаас нэр дэвшигч Дональд Трамп ялалт байгууллаа. Доод тал нь 270 санал авсан нэр дэвшигч Ерөнхийлөгч болох болзол хангах юм.

Трамп 270-аас дээш төлөөлөгчийн санал авсан нь хэдийнэ тодорхой болсон. Ингэснээр Трамп АНУ-ын Ерөнхийлөгчөөр хоёр дахиа ажиллахаар боллоо. 
Үлдсэн цөөн хэдэн мужид ялагчийн нэрийг зарлаагүй байгаа ч тооллого сүүлийн шатандаа орсон, саналын зөрүү хол байгаа учир Трамп тэдгээр мужийн төлөөлөгчийн саналыг авах нь ойлгомжтой болж байна. 

Сүүлд Висконсин мужийн үр дүн тодорхой болж, төлөөлөгчийн 10 саналыг авснаар түүний ялалт тодорхой болов.

Өдгөө 78 настай тэрбээр 2016 оны сонгуульд 304 саналаар ялж байсан бол 2020 оны сонгуульд 232 саналаар одоогийн Ерөнхийлөгч Жо Байденд ялагдаж байв.

Одоогоор Ардчилсан намаас нэр дэвшигч Камала Харрис олон нийтийн өмнө ямар нэг мэдэгдэл хийгээгүй байна.