Сингапурын Чанги олон улсын нисэх онгоцны буудал тав дахь жилээ дараалан дэлхийн шилдэг онгоцны буудлаар тодорлоо.

Дэлхийн шилдэг нисэх онгоцны буудалд шагнал гардуулах ёслол энэ сарын 14-нд Амстердам хотноо болж өнгөрсөн байна. Нисэх онгоцны буудлаар үйлчлүүлэгч сая сая иргэдийн дунд явуулсан судалгааны үр дүнгээр шагналын эзнийг тодруулдаг аж.

Тав дахь жилээ тэргүүлж буй Чанги нисэх онгоцны буудалд 24 цагийн турш сүүлийн үеийн кинонуудыг үнэгүй үзүүлэх кинотеатр, дээвэр дээрх усан сан, бүх төрлийн эрвээхэйнүүдийг үзэж сонирхох цэцэрлэгт хүрээлэн гэх мэт үзвэр үйлчилгээ байдгаас гадна гурван терминал нь зорчигчдын ая тухтай байдлыг дээд зэргээр хангаж чаддаг байна. Түүнчлэн энэ оны хоёрдугаар хагаст тус нисэх онгоцны буудал дөрөв дэх терминалаа нээх аж.

Чанги Эйрпорт Группын гүйцэтгэх захирал Ли Сио Хианг, “Skytrax-ийн дэлхийн шилдэг нисэх онгоцны буудал шагналыг тав дахь жилээ дараалан хүртэж байгаа нь 50 000 хүний бүрэлдэхүүнтэй ажиллаж байгаа манай Чанги нисэх онгоцны буудлын хамт олонд маш их урам өглөө. Энд ажилладаг хүн болгон зорчигчдод хамгийн мартагдашгүй сайхан дурсамжийг үлдээхээр хичээж ажилладаг.” хэмээн онцолжээ.

Түүнчлэн эхний 10т багтсан хэд хэдэн нисэх буудлууд өнгөрсөн жилийн байрнаасаа хөдөлсөн байна.

Токиогийн Олон улсын нисэх онгоцны буудал хоёр ч байраар дээшилж, өнгөрсөн жил 2т бичигдэж байсан Сөүлийн Инчоны Олон улсын нисэх буудлын байрыг эзэлсэн байна.

Мюнхений нисэх онгоцны буудал өнгөрсөн жилийнхээс нэг байраар хойшилж 4т бичигджээ.

Катарын Хамад Олон улсын нисэх буудал энэ жил дөрвөн байраар дээшилж 6д бичигдсэн бөгөөд 2015 онд 22т бичигдэж байсны хувьд энэ нь маш том ахиц юм.

ХБНГУ-ын Франкфуртын нисэх буудал Осакагийн Кансай Олон улсын нисэх буудлыг байрнаас нь буулгаж шилдэг 10т анх удаагаа орж ирсэн байна.

Шилдэг 10т Хойд Америкийн нисэх онгоцны буудлуудаас ахиад л багтсангүй.

Канадын Ванкуверийн нисэх буудал Хойд Америктаа найм дахь жилээ дараалан шилдгээр тодорч байгаа бөгөөд нэг байр урагшлан 13т бичигджээ.

АНУ-ын 2017 оны шилдэг нисэх онгоцны буудлаар Цинциннати/Хойд Кентакигийн Олон улсын нисэх онгоцны буудал шалгарсан ба жагсаалтын 26д бичигдэж байна. Түүний араас 28д Денверийн олон улсын нисэх онгоцны буудал бичигджээ.

Жагсаалтыг бүтнээр нь харахыг хүсвэл http://www.worldairportawards.com/Awards/world_airport_rating.html линкээр орно уу.

Түүнчлэн нисэх онгоцны буудлуудыг хамгийн цэвэрхэн, хамгийн сайн хоолтой зэрэг олон төрлөөр шалгаруулж шагнал гардуулсан байна.

Токиогийн Ханеда нисэх буудал дэлхийн хамгийн цэвэрхэн нисэх онгоцны буудлаар, Жакартагийн Сокарно-Хаттагийн Олон улсын нисэх онгоцны буудал хамгийн их дэвшил гаргасан буудлаар тодорсон байна.

Хоолны хувьд Хонконгийн нисэх буудал тэргүүлсэн бол Тайванийн Таоюань нисэх онгоцны буудлын ажилчид хамгийн шилдгээр шалгарчээ. Харин шоппингийн хувьд Лондонгийн Хитроуг гүйцэх нисэх буудал байсангүй.

2017 оны Дэлхийн хамгийн шилдэг 10 нисэх онгоцны буудал

1. Сингапурын Чанги Олон улсын нисэх онгоцны буудал
2. Токиогийн Олон улсын нисэх онгоцны буудал
3. Инчоны Олон улсын нисэх онгоцны буудал
4. Мюнхений нисэх онгоцны буудал
5. Хонг Конгийн Олон улсын нисэх онгоцны буудал
6. Дохагийн Хамад Олон улсын нисэх онгоцны буудал
7. Нагояагийн Чубу Олон улсын нисэх онгоцны буудал
8. Цюрихийн нисэх онгоцны буудал
9. Лондоны Хитроу нисэх онгоцны буудал
10. Франкфуртын нисэх онгоцны буудал

www.cnn.com