Монголын рок попын шилдгүүд Солонгос улсыг зорин элэг нэгтнүүддээ ая дуугаа өргөх гэж байна. Тодруулбал 9-р сарын 22-ны өдөр МУГЖ Б.Сарантуяа болон Харанга хамтлаг, МУГЖ Далантай, МУГЖ Батсүх нар ХААН Банкны зохион байгуулах урлагийн арга хэмжээнд оролцож ая дуугаа өргөх юм байна. Энэ талаар МУГЖ Б.Сарантуяа болон ХААН Банкны Маркетингийн газрын захирал М.Чанцалмаа нараас тодрууллаа.

МУГЖ Б.Сарантуяа: Ямар ч үнэ төлбөргүй болдогоороо энэ тоглолт онцлогтой

-Таныг ойрын өдрүүдэд  Солонгос улсыг зорих гэж байгаа талаар дууллаа. Энэ талаар тодруулах гэсэн юм.
-Тиймээ. Миний хамтран ажилладаг Монголын хамгийн том, хамгийн шилдэг ХААН Банкнаас Солонгос улсад байгаа монголчууддаа зориулан жил болгон зохион байгуулдаг соёлын арга хэмжээнд оролцож элэг нэгт монголчууддаа ая дуугаа өргөн барих гэж байна. Миний хувьд энэ арга хэмжээнд 4 дэх удаагаа оролцох гэж байна.

-Энэ тоглолтын онцлог нь юу юм бол.
-Хэд хэдэн онцлогтой. Нэгдүгээрт энэ арга хэмжээ маань ашгийн төлөө бус. Зөвхөн тэнд байгаа монголчууддаа зориулж үнэ төлбөргүй болдог. Хоёрдугаарт аль нэг  бар, уушийн газар биш мэргэжлийн тайзан дээр тоглолт тавигддагаараа онцлогтой. Гуравдугаарт зөвхөн нэг дуучин юм уу, нэг хамтлагийн тоглолт биш олон мундаг чадалтай уран бүтээлчдийн хамтарсан гала тоглолт болдог гээд бусад гадаадад болдог концертуудаас олон давуу талтай сайхан арга хэмжээ.  Энэ жилийн хувьд мөн л олон уран бүтээлчид явж байгаа.

-Нууц биш бол та энэ тоглолтонд  ямар уран бүтээлүүдээрээ бэлэг барих вэ?
-Би өнгөрсөн хугацаанд нийт 13 цомог  гаргасан. Тэгэхээр эдгээр цомгуудад орсон дуунуудаасаа дуулна. Жишээ нь Аргагүй амраг, Би жаргалтайгаас эхлээд сүүлийн үеийн Төрсөн өдрийн аялгуу гээд бүх цомогт багтсан ард түмний хайртай тэр л дуунуудаасаа дуулах юм. Мөн Харанга хамтлагийн дуучин Лхагвасүрэнтэй хамтарч дуулсан уран бүтээлээ үзэгчдэдээ хүргэх болно.

-Танд баярлалаа

ХААН Банкны Маркетингийн газрын захирал М.Чанцалмаа:  

-9-р сарын 22-ний өдөр Солонгос улсад  ажиллаж амьдарч байгаа монголчуудад зориулсан тоглолт болох гэж байгаа юм байна. Ерөнхий зохион байгуулагчийн хувьд энэ тоглолтын талаар дэлгэрэнгүй мэдээлэл өгөөч.
-Тиймээ. Манай банк Солонгос улсын ургацын баярыг тохиолдуулан тэнд ажиллаж амьдарч, сурч байгаа монголчууддаа урлагийн тоглолтоор бэлэг барьдаг болоод хэдэн жил болсон байна. Үнэ төлбөргүй зөвхөн монголчууддаа зориулж уг тоглолтыг зохион байгуулдаг болохоор тэнд байгаа монголчуудын маань хүсэн хүлээдэг арга хэмжээ болтлоо өрөгжжээ. ХААН Банк энэ соёлын арга хэмжээг 4 дэх удаагаа зохион байгуулах гэж байна. Бид энэ арга хэмжээндээ нэг дуучин, нэг хамтлагийг онцгойлдоггүй. Хэд хэдэн уран бүтээлчдийг цуглуулж олон талын уран бүтээлээр үзэгчдийнхээ сэтгэл оюуныг баясгахыг зорьдог.

Тиймдээ ч нэг удаагийн тоглолтоор дор хаяж 3-4 хамтлаг дуучдын уран бүтээлийг монголчууддаа хүргэдэг. Ингэснээр харийн нутагт байгаа монголчууд маань нэг үдэш олон уран бүтээлчдийн гала концертыг үзэх боломжтой болдог. Мөн энэ арга хэмжээ маань зөвхөн урлагийн тоглолтоор хязгаарлагддаггүй. НХХЯ, НДЕГ, ГАХИТ зэрэг төрийн байгууллагуудтай хамтарч монголчуудыгаа бүх төрлийн хэрэгтэй байгаа мэдээллээр нь хангах тэдэнд банк санхүүгийн цогц үйлчилгээг хурдан шуурхай хүргэх арга хэмжээг зохион байгуулдаг юм. Тиймээс энэ арга хэмжээ  маань Солонгост ажиллаж амьдарч байгаа монголчуудынхаа хэрэгцээ шаардлагыг хангах үүднээс зохион байгуулагддаг цогц арга хэмжээ гэж ойлгож болно.

-Энэ удаагийн тоглолтонд ямар ямар уран бүтээлчид оролцох бол.
-Энэ жилийн хувьд ч хэд хэдэн уран бүтээлчид Солонгост очих болно. Манай банктай сүүлийн 7 жил хамтран ажиллаж байгаа МУГЖ Б.Сарантуяа, мөн бидэнтэй хамтран ажилладаг Монголын рок попын загалмайлсан эцэг гэгддэг Харанга хамтлаг, Монголын дуурь болоод нийтийн дууны томоохон төлөөлөлүүдийн нэг МУГЖ Далантай болон Завханы нэрээрээ ард түмнийхээ дунд алдаршсан МУГЖ Б.Батсүх бүжгийн Dream life хамтлаг гээд олон уран бүтээлчид гала тоглолтонд оролцоно. Ингэснээр  үзэгчид Сараагийн хайрын бурхантай, Харангын Толин хултай, Батсүх гавьяатын Завхан голтой хамт амралтынхаа нэг өдрийг мартагдашгүй сайхнаар өнгөрөөх юм.

-Ярилцсанд тань баярлалаа.