УИХ-ын дарга З.Энхболд болон УИХ-ын зарим гишүүн ОХУ-д айлчилж байна. Өчигдөр УИХ-ын дарга З.Энхболдод Холбооны Хурлын Төрийн Думын гишүүн, Монголтой харилцах бүлгийн дарга С.М.Миронов бараалхжээ.

Энэ айлчлалын үеэр “Чингис Лэнд Девелопмент” групп, ОХУ-ын “Дальстроймеханизация” ХК-ний хамтын ажиллагааны гэрээнд гарын үсэг зурах ёслол болов. Ёслолд  Монголын талаас “Чингис Лэнд Девелопмент” группын захирал Ц.Гантулга, ОХУ-ын талаас “Дальстроймеханизация” ХК-ийн захирал Гриднев Виталий Юрьевич нар гэрээнд гарын үсэг зурлаа.

Монголын “Чингис Лэнд Девелопмент” групп болон ОХУ-ын  “Дальстроймеханизация” ХК хамтын ажиллагааны гэрээнд гарын үсэг зурснаар “Алтанбулаг- Замын-Үүд” чиглэлийн Чингисийн хурдны замын ОХУ-ын нутаг дэвсгэрээр дайрах хэсгийг хамтран барина.

Энэхүү хурдны замын Алтанбулагаас цааш Улаан-Үдэ, Иркутскийн чиглэлийн 230-300 км замын ажлыг монголын талаас “Чингис Лэнд Девелопмент”, ОХУ-ын талаас талаас “Дальстроймеханизация” ХК хийж гүйцэтгэнэ хэмээн УИХ-ын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.