Хоёр жилийн өмнө 18 настай Б.Номин охин дэлхийн хамгийн том түрийтэй гутлыг хийж, Гиннесийн номонд бүртгүүлэх санааг сэджээ. Ингээд өөрийн санаагаа ажил хэрэг болгох багийг бүрдүүлсэн байна.

Өнөөдөр Б.Номин 20 настай. Түүний зорилго биелж дэлхийн хамгийн өндөр түрийтэй гутал бүтжээ. Юун түрүүнд тэрээр Монголчууддаа бүтээлээ сонирхуулахыг зорьсон байна. Харин дараа нь Гиннесийн номонд бүртгүүлэх ажилдаа шуурхайлан орох гэнэ.
 
Одоогоор дэлхийн хамгийн өндөр гутал Америкийн Миннесота мужид байдаг ажээ. Энэ гуталны өндөр нь 6 метр юм байна. Тиймээс одоохондоо манай Монгол гутлыг гүйцэх өндөр, том түрийтэй гутал дэлхийд байхгүй талаар Б.Номин охин ам бардам ярьж байлаа.



Энэхүү Монгол гутлын өндөр нь 9 метр, урт нь 6 метр, өргөн нь 2 метр юм байна. Харин гутлын размер нь 39х195=7605 ажээ. Гутлыг 45 метр өндөртэй, 4,4 тонн жинтэй аварга хүн л өмсөх боломжтой. Дэлхийн хамгийн том Монгол гутлыг бүтээхэд 225 ширхэг үхрийн арьс, 4500 метр олс, 120 кв.метр эсгий  72 кв.метр пролон, 13 куб.метр мод, 300 литр цавуу, 180 кв.метр брезент тус тус оржээ.

Өвөг дээдсийн минь ухаан шингэсэн Монгол гутал европ гутлаас тэс ондоо. Байгаль газар дэлхийгээ сэндийчихгүйн үүднээс ээтэн хоншоортой, сууж босоход амар тул хойгуураа задгай, дайн байлдаан зэрэг яаралтай үед өмсөхөд хялбар зэрэг олон давуу талтай юм.

Хэрвээ та бүхэн энэхүү гайхалтай том гутлыг харахыг хүсвэл Төв аймгийн нутаг Цонжин болдогт байх Чингис хааны хөшөөт цогцолборыг зориорой.

Ингээд та бүхэн холбоотой мэдээнээс Дэлхийн хамгийн том Монгол гутлын талаарх видео болон фото мэдээг хүлээн авна уу.

О.Ариунбилэг, оператор А.Ариунболд