Ардчилсан намын ҮЗХ-ны хурал болох гэж байгаа. Тиймээс зарим намын гишүүд ҮЗХ биш онц их хурал хуралдуулах ёстой хэмээн мэдэгдээд, зарим нь бур хөдөлгөөн байгуулсан. Тэдний нэг Хэнтий аймгийн Ардчилсан намын гишүүн, хөдөлгөөн зохион байгуулагч М.Санжаадоржоос доорхи зүйлийг тодрууллаа.

-Сайн байна уу. Танай аймгийн ардчилагчид хөдөлгөөн байгуулаад бужигнаж байна гэх юм. Чухам юунаас болоод үймчихэв ээ?
-Хөдөлгөөн байгуулж, үзэл бодлоо илэрхийлэхгүй бол ерөөсөө болохгүй байна. Бидний үгийг сонсохгүй байна. Бидний тавьж байгаа асуудал бол ойлгомжтой. Ерөөсөө энэ балай хамтарсан Засгийн газраас намаа татаж авах асуудал юм. Тиймээс энэ удаад ҮЗХ биш намын онц их хурлыг яаралтай хуралдуулах шаардлага тулгараад байна. Одоогийн байдлаар 45 хүний гарын үсэгтэй өргөх бичгийг намдаа хүргүүлээд сууж байна. Бид өнгөрсөн хавар аймгийнхаа намын байранд хуралдаж, анх удаа ийм шийдвэр гаргасан. Гишүүд бүгд дэмжиж гарын үсгээ зурж л байна.

-Гишүүд бүгд дэмжлээ гэсэн. Эсэргүүцэж байгаа нэг ч хүн байхгүй гэж үзэж болох уу?
-Эсэргүүцэж байгаа ганцхан хүн бий. Тэр нь манай аймгаас сонгогдсон ҮЗХ-ны гишүүн н.Тамир юм. Манай энэ хөдөлгөөнийг хамгийн их дэмжиж байгаа хүн бол "Цагаан шонхор"-ын Ч.Энхтайван. Тэр ерөнхийдөө бидэнд тодорхой чиг үүрэг өгч, дэмжиж байгаа.

С.Ууганбаяр