Сангийн сайд Ч.Хүрэлбаатар 2018 оны төсвийн гүйцэтгэлийн талаар өчигдөр дэлгэрэнгүй мэдээлэл өгөв. Хэдийгээр өнгөрсөн онд улсын төсвийн тэнцэл ашигтай гарсан ч энэ оны улсын төсвийг 2 их наяд төгрөгийн алдагдалтай байхаар УИХ-аас баталсан. Иймд энэ онд улсын төсвийг тодотгох уу гэсэн асуултад Сангийн сайд үгүй гэж хариуллаа.

Өмнөх жилүүдэд улсын төсвийн тодотголыг УИХ-аар байнга баталдаг байсан тул бид үүнийг байх л зүйл мэт хүлээн авдаг болтлоо дассан байв. Энэ нь орлого зарлагаа буруу тооцоолох, тодотгох юм чинь хэмээн замбараагүй зардал гаргах буруу зуршлыг төсвийн ерөнхийлөн гүйцэтгэгч нарт суулгадаг гэж Сангийн сайд тайлбарлав. Тэгвэл энэ оны улсын төсвийн алдагдлыг хэрхэн нөхөх вэ гэдэг асуулт урган гарна.

Өнгөрсөн онд зэс, нүүрсний үнэ өссөн, татварын орлого давсан нь төрийн санг зузаатгасан. Харин энэ онд зэс, нүүрсний эрэлт буурах, улмаар үнэ буурах эрсдэл бий. Уг нь өмнөх Засгийн газрын үеэс МИАТ, Хөрөнгийн бирж гэх мэт томоохон өмчүүдийг хувьчлах шийдвэрт хүрч, жагсаалтыг баталсан. Сангийн сайд Ч.Хүрэлбаатар өнгөрсөн зургаадугаар сард УИХ-д өмч хувьчлалын тогтоолын төслийг өргөн барьжээ. Гэвч өнөөг хүртэл энэ төслийг хэлэлцсэнгүй, хэзээ хэлэлцэх нь ч тодорхойгүй байна.