Залуучуудын хөдөлмөр эрхлэлтийг дэмжих хөтөлбөрийн хүрээнд Улсын хэмжээнд шинэ технологи, инновац шингээсэн гарааны бизнес эрхэлж буй залуучуудад санхүүжилт олгох СТАРТАП-2022 Улсын аварга шалгаруулах тэмцээний сүүлийн шат өнөөдөр болж ялагчаа тодруулжээ. 

Хөдөлмөр нийгмийн хамгааллын яам JCI Mongolia, SMS-Startup Marketing Space, Startup Mongolia байгууллагуудтай хамтран зохион байгуулсан энэ уралдааны: 

• Нэгдүгээр байрт- Медтек партнер баг “Эмийн худалдаанд нэвтрүүлэх цахим технологи” төслөөр 20 сая төгрөгийн санхүүжилт
• Хоёрдугаар байрт-
  -Эйрий фелт баг “Ноосоор агаар цэвэршүүлэх технологи” төслөөр 17 сая төгрөгийн санхүүжилт
  -Эдүкэшн зон баг “Боловсролын мэдээллийн аппликэйшн” төслөөр 17 сая төгрөгийн санхүүжилт
• Гуравдугаар байр- 
  -Апдэйт баг “ЕБС-ийн сурагчдад зориулсан аппликэйшн” төслөөр 15 сая төгрөгийн санхүүжилт
  -Крийд студи баг “Интерактив интерьер” төслөөр 15 сая төгрөгийн санхүүжилт
  -Муфин апп баг “Санхүүгийн орлого зарлагын аппликэйшн” төслөөр 15 сая төгрөгийн санхүүжилтийг эргэн төлөх нөхцөлгүйгээр олгосон байна. 

Стартап-2022 улсын аварга шалгаруулах тэмцээнд энэ жил Монгол Улсын өнцөг булан бүрээс 460 гаруй залуучуудын 290 стартап баг бүртгүүлсэн. Энэ нь өнгөрсөн оныхтой харьцуулахад тав дахин их оролцоотой байжээ.  

Уралдаанд оролцохоор анх 290 баг бүртгүүлснээс эхний шалгаруулалтад 41 баг тэнцэж, олон улсын жишгийн дагуу сургалт хөтөлбөрт хамрагдаж, менторинг үйлчилгээ авч, бизнесийн санаагаа шүүгчдэд танилцуулах, салбар бүрийн мэргэжлийн менторуудаас зөвлөгөө авч, бизнесээ дараагийн шатанд гаргах боломж, нөхцөлийг бүрдүүлэхийн тулд хамтран ажиллажээ. Эдгээр 41 багаас эцсийн шатанд 13 баг тэнцэж өнөөдөр ялагчаа тодрууллаа. 



Шүүгчээр УИХ-ын гишүүн Ч.Ундрам, JCI Монгол байгууллагын 2022 оны Үндэсний Ерөнхийлөгч Ж.Дамдинцэрэн, PREMIUN GROUP-н үүсгэн байгуулагч А.Ганхуяг, STARTUP Marketing Space ХХК-ийн ТУЗ-ийн дарга Ж.Золзаяа, Стартап Монгол ТББ-ын ТУЗ гишүүн П.Пүрэвбазар ажиллаж Үндэсний ялагчийг тодруулсан байна.