2020 оны эхний хагас жилд Монгол Улсад ирсэн гадаад иргэдийн тоо өмнөх оноос 80.3 хувиар буурчээ. Харин агаарын тээврийн салбарын орлого энэ хугацаанд 48.1 хувиар буураад байна.

Цар тахлын нөлөөнд шууд өртсөн компаниудын борлуулалт буурснаар банкны зээл, түрээс, ажилчдын цалин олголтод доголдол үүсээд байгааг Санхүүгийн тогтвортой байдлын тайланд онцлоод байна.

Хүндхэн байдалд ороод буй аялал, жуулчлалын салбарт чиглэсэн дэмжлэг одоогоор байхгүй байгааг аялал, жуулчлалын салбарынхан мэдээлж байна. Тухайлбал: "Тэнгэр трэвел" компани хөл хорио тавигдах хүртэл үйл ажиллагаагаа зогсоожээ. Харин “Хаан травел” компани ихэнх ажилтнууддаа чөлөө олгосон гэдгээ мэдээллээ. Тус компани зуны улиралд дотоодын аялал, жуулчлалын бүтээгдэхүүнүүд шинээр гарган ажилласан ч эрэлт тааруу байсныг онцоллоо.

Одоогоор дотоодын аялал, жуулчлалын бүтээгдэхүүн шинэ байгаагаас гадна зугаалгын шинжтэй байгаа тул энэ төрлийн бүтээгдэхүүний эрэлт тааруу байна гэж “Нью жуулчин турс” компани мэдээлж байна. Харин ирэх жилээс бүтээгдэхүүн, үйлчилгээний чанарыг сайжруулж чадвал эрэлт өснө гэж тус компани тооцоолжээ.

Б.Төгсбилиг
Эх сурвалж: bloombergtv.mn