Хот байгуулалт, барилга, орон сууцжуулалтын сайд Ж.Батсуурь салбарын ТББ-ын удирдлагуудтай уулзлаа.

Тэрбээр "Төрийн зарим чиг үүргийн ажлыг төрийн бус байгууллагуудаар гүйцэтгүүлдэг. Тиймээс өнөөдөр тэдний санаа бодлыг нь сонсож, ирэх дөрвөн жилд хэрэгжүүлэх бодлогоо танилцуулж байна.

Ирэх дөрвөн жилд хот байгуулалт барилга, орон сууц барих чиглэлээр үсрэнгүй хөгжинө гэж бодож байна.

Тухайлбал,

• Монголд өмнө хэрэгжиж байгаагүй гүүрэн байгууламжууд
• Богдхан уулын Зайсангийн амыг Кувейтийн амтай холбох туннель
• Метро байгуулах дэд бүтэц
• Хурдны галт тэрэгний дэд бүтэц
• Улаанбаатар хотыг дагасан Хөшигтийн хөндий гэх хот байгуул
• Хархорин хотыг байгуулна
• Орон нутгуудад хот байгуулж, орон сууцжуулах бодлого явуулна. Хотод болон орон нутагт амьдарч байгаа хүмүүсийн амьдралын чанарыг ижилхэн болговол Улаанбаатарын түгжрэл, утаа, стресс, авлигал, хахууль, төрийн дарамт арилна.

Жишээлбэл, энэ дөрвөн жилд Засгийн газрын ордныг Улаанбаатар хотоос гаргана гэж төлөвлөж байна. Улмаар яам, тамгын газар луу зорьж хотын төв рүү тэмүүлэх төвлөрөл сарнина.

Ингэж томоор төсөөлбөл одоогийн Улаанбаатар шууд л тэлэх болно.

Буянт Ухаа, Өлзийт хороолол, Хөшигийн хөндийн хот, мөн түүний урд Майдар хотыг дагуулаад барина. Богдхан уулыг тойруулж хотуудыг байгуулна гэсэн үг.

Харин хойд талдаа Амгалангаас толгойт хүртэлх том уулыг нүхлэхийг нь нүхэлж, давахыг нь давуулан дэд бүтэц бий болгоно.

Эдгээр ажлуудыг хугацаа алдахгүйгээр, ирэх оны төсвийг ч хүлээхгүйгээр шинэ Засгийн газар төсвийн тодотгол хийж том том бүтээн байгуулалтуудыг энэ зун, намартаа багтааж эхлүүлнэ. Яаралтай хэрэгжүүлэхгүй бол 2028 он хаяанд байна.

Өмнө Засгийн газар байгуулагдсанаар бодлого хөтөлбөрөө дараагийн жилийн төсөвт тодотгох гэж хүлээдэг байсан. Харин бид ингэж ажиллахгүй. Одоо шууд төсөв тодотгож, ажилдаа орно.

Энэ ажилд хамгийн том тус болох хүмүүс нь барилга, нийтийн аж ахуйн салбарын төрийн бус байгууллагууд, үе үеийн ахмад ажилчид байх ёстой. Тиймээс эдгээр хүмүүсийн саналыг сонсож байна" гэв.