Өмнөд Солонгос, Хятад, Япон, Монголын залуус өнөөдөр Зүүн Хойд Азийн Уур амьсгалын залуучуудын зөвлөлийг байгууллаа.

Тус зөвлөлийг Монголын залуус санаачилсан бөгөөд энэ нь бүс нутгийн хамтын ажиллагаа багатай, цөмийн зэвсэгтэй хоёр улстай  Зүүн Хойд Азийн хувьд онцгой ач холбогдолтой аж. 

Зүүн Хойд Азийн бүс нутагт залуус анх удаа нэгдэж, хамтарсан зөвлөл байгуулж буй нь өөрөө түүхэн алхам. Зөвлөл байгуулагдсанаар уур амьсгалын өөрчлөлт, байгаль орчны асуудлаар хамтарсан үйл ажиллагаа өрнүүлэх, залуусын манлайллыг бодит ажил болгон хувиргах суурь тавигдана гэдгийг Тусгай үүрэг гүйцэтгэгч Элчин сайд Н.Чимгүүндарь онцоллоо.  

Зөвлөлийн хүрээнд бүс нутгийн “Уур амьсгалын тунхаг бичиг”-т гарын үсэг зурсан бөгөөд үүнд цөлжилт, биологийн олон янз байдлын доройтол, агаарын бохирдлын сөрөг нөлөөг онцолж, эдгээр асуудалд залуучууд тууштай анхаарч, хамтран ажиллахаа илэрхийлсэн юм. 

Өмнөд Солонгосын төлөөлөл Юури Шин хэлэхдээ, ган гачиг, үер, газрын цоорол зэрэг байгаль цаг уурын гамшиг нэмэгдэж, хүн амын эрүүл мэндэд сөргөөр нөлөөлж байна. Улирлын хугацаа өөрчлөгдөж, нийгмийн дасан зохицох чадварт сорилт тулгарч байна. Иймээс шийдвэр гаргах төвшинд залуусын дуу хоолойг хүрэх, мэдлэг, мэдээллийг олон нийтэд түгээх нэн шаардлагатай гэв.

Зөвлөлийн гишүүд залуусын санал санаачилгыг бодлогын төвшинд тусгах, төсөл хөтөлбөрт хамруулах, дуу хоолойгоо нэгтгэхийн тулд олон талт хамтын ажиллагаа, мэдээллийн хүртээмжийг нэмэгдүүлэх шаардлагатай. Мөн тэдэнд зориулсан мэдээлэл, сургалт, нөлөөллийн арга хэмжээг тогтмол зохион байгуулах хэрэгтэй гэв. 

Монгол Улс 2026 онд Дэлхийн уур амьсгалын өөрчлөлтийн 27 дугаар бага хурлыг (COP27) зохион байгуулах болсноо албан ёсоор зарласан. Энэхүү олон улсын хэмжээний арга хэмжээ нь дэлхийн уур амьсгалын бодлого тодорхойлогчдыг Улаанбаатарт нэгтгэх бөгөөд шинэ залуу зөвлөл үүгээр дамжуулан Монголын залуусын үүрэг оролцоог тодотгох боломжийг нээж байгаа юм.