“Хүний эрх хүүхдийн эрхээс эхэлнэ” уулзалт, хэлэлцүүлгийн үеэр ХЭҮК-ын гишүүн Ж.Хунан "18 нас хүрээгүй хүн бүрийг хүүхэд гэж үзнэ. Насанд хүрсэн хүн бүр хүүхдийн өмнө үүрэг хүлээгч гэдгээ ухамсарлах ёстой" гэдгийг онцлов.

Тэрбээр “Хүүхэд хамгаалал хүүхдийн эрх” илтгэлдээ хүүхдийн эрх зөрчигдөхөд нийгэмд тогтсон хэвшмэл ойлголт ихээхэн нөлөөлж байна гэдгийг тодотгосон.

16 нас хүрч иргэний үнэмлэх авснаар тухайн хүүхдийг нас биед хүрлээ, өөрөө шийдвэр гаргаж, хариуцлагаа бүрэн хүлээх чадвартай боллоо гэсэн зарим эцэг, эхийн хандлагаас үүдэн хүүхэд үл хайхрах хүчирхийлэлд өртөх, гэр бүлийн хараа хяналтаас орхигдох, улмаар гэмт хэрэг, зөрчлийн хохирогч, холбогдогч болох эрсдэл үүсдэг. 

Тиймээс 18 нас хүрээгүй хүн бүрийг хүүхэд гэж үзнэ гэдгийг онцолж, насанд хүрсэн хүн бүр хүүхдийн өмнө үүрэг хүлээгч гэдгээ ухамсарлан нэг ч хүүхдийг хохироохгүй, хөгжлийн гадна үлдээхгүй байхын төлөө хүн бүр оролцоотой байхыг уриаллаа. 

Харин Монгол Улсын гавьяат багш Б.Мөнхжаргал хүүхдийн нас, хүйс, биеийн онцлогийг харгалзан үзэж байхыг нийт эцэг, эхчүүдэд зөвлөж, хүүхэд ирээдүйд ямар хүн болж төлөвших нь гэр бүлийн орчноос 100 хамааралтайг анхааруулсан юм. 

"Бүх нийтийн боловсролын төлөө" ИНҮЭ-ийн ерөнхий зохицуулагч Д.Тунгалаг хүүхдийн сурч, боловсрол эрх түгээмэл байдлаар зөрчигдөж байгааг онцолж, боловсролын салбар дахь тэгш бус байдлыг арилгаж байж хүүхдийн эрх бүрэн хангагдах суурь тавигдана гэдэг байр суурийг хэллээ.

Эх сурвалж: ХЭҮК