Увс аймгийн Зүүнговь суманд боомын хүний өвчлөлийн тохиолдол бүртгэгдэж, тус аймгийн нэгдсэн эмнэлэгт эмчлэгдэж байна.

Уг тохиолдол нь боомоор өвчилсөн үхрийг төхөөрөх явцдаа халдвар авсан болохыг энэ сарын 7-ны өдрийн Увс аймгийн ЗӨСТ-д хийсэн молекул биологийн /PCR/ шинжилгээгээр баталгаажуулсан гэж ЗӨСҮТ-ээс мэдээлсэн.

Тиймээс, өвлийн идэшний цаг ойртсон үед, эрүүл ахуйн баталгаат газраас мах худалдан авахыг анхаарууллаа.

Санамж,

• Боом  нь өвчтэй мал, амьтнаас хүнд халдварладаг халдварт өвчин. Голдуу өвчтэй малыг өвчих, хуулах, нядлах, үхсэн малын сэг зэмтэй ажиллах үед гэмтсэн арьс салстаар халдвар дамжин арьсны хэлбэрээр өвддөг.
• Гар, хүзүү, хөлийн арьсан дээр хар  тов бүхий хатиг, шарх үүсдэг, амь насанд халтай өвчин.
• Өвчилсөн малын мах, махан бүтээгдэхүүн, бохирлогдсон хүнсийг дутуу болгож хэрэглэснээс гэдэсний хэлбэрээр өвчилнө. 
• Ноос, ноолуур боловсруулах, арьс ширний үйлдвэрлэл эрхлэх явцад бохирлогдсон тоосонцор, агаараар дамжин халдвар авч уушгины хэлбэрээр өвчилнө.

Уг өвчнөөс сэргийлэхийн тулд дараах зөвлөмжийг анхаарна уу,

1. Баталгаатай газраас мах,  идэш авах
2. Мах, ногоо, талхны хутга, ганпанз, вандан тусдаа байх
3. Махыг сайтар буцалгаж хэрэглэх
4. Дутуу боловсруулсан мах, махан бүтээгдэхүүнийг хэрэглэхгүй байх
5. Үхсэн малын мах, арьс ширийг ашиглахгүй байх
6. Амьтны сэг, зэмийг оролдохгүй байх
7. Гараа зүссэн болон арьсандаа ил шархтай үед мал, амьтны гаралтай бүтээгдэхүүнтэй харьцахгүй байх                    
8. Мал амьтан, түүний гаралтай бүтээгдэхүүнтэй харьцсаны дараа гараа сайтар савандаж угаах зэрэг болно