УИХ-ын чуулганы нэгдсэн хуралдаанаар өчигдөр “Стратегийн ач холбогдол бүхий ашигт малтмалын ордын төрийн эзэмшлийн хувь, хэмжээг орлуулах тухай” УИХ-ын тогтоолын төслийг хэлэлцэн батлав.

Францын Орано групптэй хамтран Дорноговь аймгийн Зөөвч-Овоо ордоос ураны баяжмалыг туршилтаар олборлож эхэлсэн. Хоёр улсын Засгийн газар хооронд Хөрөнгө оруулалтын гэрээ байгуулснаар энэ онд баяжмалыг худалдаж эхэлнэ. БНХАУ-ын нутгаар дамжуулан далайгаар Европын холбоон долоон улсад худалдах юм. Худалдааг олборлогч компани буюу “Бадрах энержи” хариуцна.

Уран нь стратегийн ач холбогдол бүхий ашигт малтмалын ордод тооцогддог. Иймд Засгийн газар Орано групптэй байгуулах Хөрөнгө оруулалтын гэрээнд зааснаар энэ ордын 34 хувийн хувьцааг эзэмшихгүй. Харин давуу эрхийн хувьцаа эзэмшинэ.

Аж үйлдвэр, Эрдэс баялгийн сайд Ц.Туваан “Манай улс ураны нөөцөөр дэлхийд эхний аравт ордог. Уранаас эрчим хүч гарган авах нь ногоон эрчим хүчинд тооцогдож байна. Иймд цаашдаа дэлхий даяар ураны хэрэглээ өснө. Дорноговь аймагт төсөл хэрэгжсэнээр нийт 1600 хүнийг ажлын байраар хангана. Газар доороос уусган баяжуулах аргаар олборлох тул байгаль орчинд үзүүлэх сөрөг нөлөө бага. Жилд 2500 тонн ураны баяжмал олборлоно” гэв.

Газар доор уусган баяжуулах аргаар нийт нөөцийн 70-90 хувийг ялгаж авдаг байна. Газрын гүн рүү хоёр хувийн хүхрийн хүчил бүхий усыг шахдаг. Усны 90-95 хувийг дахин ашигладаг.   

Мөн зарим оронд ураныг ил болон далд уурхайд олборлодог. 30 жил үргэлжлэх энэ төслийн өгөөж 51 хувь байна. Энэ нь цэвэр ашгийн 51 хувийг Монголын Засгийн газар эзэмшинэ гэсэн үг биш юм. Өгөөжид бүх татвар, нийгмийн даатгалын шимтгэл, орон нутагт оруулах хөрөнгө оруулалт, газар, усны төлбөр хураамж зэрэг багтжээ.

Орано групптэй Хөрөнгө оруулалтын гэрээ байгуулсны дараа Чех, БНХАУ, ОХУ-ын компаниуд мөн энэ салбарт хөл тавихаар зэхэж байна. Ураны ашиглалтын найман тусгай зөвшөөрлийг хэд хэдэн компанид олгожээ.