“Америкийн алдарт зохиолч Теодор Драйзерын ядуу гэр бүлээс гаралтай Клайд хүүгийн өрөвдөлтэй амьдралын тухай өгүүлдэг “Америкийн эмгэнэлт явдал” роман. Адал явдалт сонгодог зохиолчдын ноён оргилуудын нэг, Английн нэрт зохиолч Томас Майн Ридийн “Хурлийз бүсгүй”, “Морь унасан толгой хүн”, “Цагаан бээлий” романыг уншиж хүн зөв амьдарвал ямар амжилтад хүрч болохыг, буруу явбал хаа хүрэхийг ойлгон авч, ирээдүйгээ өөрөө төсөөлөн тодорхойлж байлаа.

Мөн Монгол Улсын Төрийн хошой шагналт алдарт зохиолч Чадраабалын Лодойдамбын “Тунгалаг тамир” романыг уншиж, Цахиур Төмөрийн тал нутгаар давхиулж явааг дотроо төсөөлж өслөө.

Энэ мэтчилэн ном их уншдаг хүүхэд байлаа, би. Ном уншсаны буянд дээд боловсрол эзэмшин ромбо зүүж, өнөөдөр нийгмийн сайн сайхан, оюуны хөрөнгө оруулалтын төлөө ажилладаг мэргэжилтэн болсон юм. Хүүхэд байхдаа уншсан номуудаасаа би ирээдүйд сайн хүн болох суурь хүмүүжлийг олж авсан гэж боддог” хэмээн Нийслэлийн Сонгинохайрхан дүүргийн 67 дугаар сургуулийн захирал Ч.Алтансүх ярилаа.

“Мөнххада” ХХК-аас “Хайр түгээх RAV4” нийгмийн хариуцлагын аяныг санаачлан “Шилэн номын сан” төслийг хэрэгжүүлж байгаа. Төслийн хүрээнд 67 дугаар сургуулийн номын санг “шилэн” болгож шинэчлэн тохижуулж, албан ёсоор хүлээн (2026.04.24) өглөө.

“Шилэн номын сан” төслийг RAV4 автомашины борлуулалтын орлогоос санхүүжүүлдэг. Иймд “Мөнххада” ХХК-аас RAV4 автомашин худалдан авагчид аль нэг сургуулийн номын санг тохижуулахад бодит хувь нэмэр болж, хүүхдүүдэд оюуны хөрөнгө оруулалт хийж байна гэсэн үг юм.

Энэ талаар “Мөнххада” ХХК-ийн Борлуулалтын хэлтсийн дарга Ю.Уянга “Манай компани 2024 оноос “Хайр түгээх RAV4” аяныг эхлүүлсэн. Энэ жил гурав дахь жилдээ амжилттай хэрэгжүүлж байна. Бид эхний жилд 6 өөр төрлийн төсөл хэрэгжүүлсэн. Үүнээс нэн чухал хэрэгцээтэй байсан, хамгийн амжилттай хэрэгжсэн нь “Шилэн номын сан” төсөл. Тиймээс 2025 оноос энэ төслөө дагнан хэрэгжүүлсээр, өнөөдөр 12 дахь сургуулийнхаа “Шилэн номын сан”-г амжилттай нээж байна.

Манай компаниас RAV4 загварын автомашин худалдан авсан үйлчлүүлэгчдийн борлуулалтын орлогын тодорхой хэсэг нь нийгмийн хариуцлагын төслүүдэд шууд хөрөнгө оруулалт болж байгаа. Энэ ташрамд өөрийн сонголтоор дамжуулан ижил үнээр, илүү үнэ цэнийг бүтээж байгаа худалдан авагч нартаа онцгойлон талархал илэрхийлмээр байна” гэв.

“Мөнххада” ХХК-аас энэ оны гурав, дөрөвдүгээр сард RAV4 автомашин худалдан авсан үйлчлүүлэгчид Нийслэлийн 67 дугаар сургуулийн “Шилэн номын сан”-ийн санхүүжүүлэгчид болж байна. Төслийг “Шилэн номын сан” гэж нэрлэсний учир нь хаалттай биш нээлттэй, гаднаас нь харахад л “Энд номын сан байна” гэж мэдэхээр, хүүхдүүдэд ном унших хүсэл, сонирхол төрүүлэхүйц орчныг бий болгохоор зорьсон аж.

Иймд “Шилэн номын сан”-гаар дамжуулан хүүхдүүдийг унших дадалд суралцах, хичээлээс гадуурх цагт тав, тухтай номын сангаар үйлчлүүлэх боломжоор хангахаар төлөвлөжээ.

Төслийн хамтрагчаар ХасБанк ажиллаж байгаа бөгөөд “Шилэн номын сан”-гийн фондыг баяжуулан ном хандивлаж буй юм байна.

Нийслэлийн Сонгинохайрхан дүүргийн 67 дугаар сургуулийн 8Д ангийн сурагч О.Энхтуул “Бид сургуульдаа “Өсвөрийн номын сан” клуб ажиллуулдаг. Манай клуб хүүхдүүдэд манлайлал үзүүлэх, ном унших, чөлөөт цагаараа хамтдаа хичээлээ хийх зорилготой. Өмнө нь манай номын сан зай талбай багатай учраас ширээ, сандал багтдаггүй, бага зэрэг тухгүй байсан.

Харин шинэ тохижилт, шийдэл үнэхээр тав, тухтай санагдаж байгаа. Мөн шинэ ном нэмэгдсэнд баяртай байна. Би адал явдалт ном унших дуртай. Чөлөөт цагаараа номын санд орж ирж бага ангийнханд ном уншиж өгдөг. Бидний номын сангийн орчныг үнэхээр гоё тохижуулж өгсөн хүн бүхэнд чин сэтгэлээсээ баярлалаа” гэв.

Он гарснаас хойш Нийслэлийн ерөнхий боловсролын 182, 4, 67 сургуулийн номын санг шинэчлэн тохижуулж, “Мөнххада” ХХК-аас RAV4 автомашин худалдан авагчдын сонголтоор гурван сургуулийн боловсролын орчныг сайжруулав.

“Шилэн номын сан” төслийг хэрэгжүүлэхдээ олон сурагчтай, номын сангийн орчин, хүрэлцээ хангалтгүй сургуулиудын мэдээллийг урьдчилан цуглуулдаг. Улмаар номын санг нь шинэчлэн тохижуулах нэн шаардлагатай сургуулийг сонгон ажлын төлөвлөгөө гаргадаг байна.