Сагсан бөмбөгийн 3х3 төрлөөр ДАШТ-ээс мөнгөн медаль хүртсэн эмэгтэй шигшээ багийн тамирчин О.Хулан, Б.Ариунцэцэг, Н.Нандинхүсэл, М.Цэрэнлхам нарыг Монгол Улсын Гавьяат тамирчин цол тэмдгээр шагнасан.

Бид "Заавал хожно" гэж өөрсдийгөө зоригжуулсан байсан.

Тэднийг шагнал авах үеэр бид "шинэхэн" Гавьяат Б.Ариунцэцэгийн сэтгэгдлийг сонирхлоо. Тэрбээр "Польшийн багтай хийсэн тоглолтын сүүлийн шийдвэрлэх мөчид  бөмбөг оруулчхаад би өөртөө ч итгээгүй.  Тэрхүү бөмбөгийг оруулна гэдэгтээ би хэдий итгэлтэй байсан ч бөмбөг цагираг руу орж байхыг хараад маш их гайхсан.

Уйлахаас өөр аргагүй маш гоё шидэлт байсан. Ялангуяа тэр шидэлтийг хийхэд  үзэгчид, фэнүүд, ард түмэн маань урам зориг өгч дэмжсэн. Бид "Заавал хожно" гэж өөрсдийгөө зоригжуулсан байсан. Сагсан бөмбөг, спортоор хичээллэх юм бол тууштай байгаарай, битгий бууж өгөөрэй, мэдээж буугаад өгмөөр өдрүүд олон байдаг ч тэдгээрийг давж гарч чадах юм бол, өдөр бүр уйгагүй хөдөлмөрлөх юм бол тэр бүхний үр шим хэзээ нэгэн цагт гарч, медалийн тавцанд зогсох өдөр ирдэг юм шүү гэж хүүхэд залуустаа хандаж хэлмээр байна" гэсэн юм.