Цагаан ордноос пүрэв гарагт мэдэгдэл хийж ерөнхийлөгч Дональд Трампыг судасны архаг өвчтэй болсныг зарлалаа.

Олон хоногийн өмнөөс Трампын гар хөхөрсөн зураг камерын дуранд бууж, олон нийт янз бүрийн таамаг дэвшүүлээд байв.

Цагаан ордны мэдэгдэлд дурдсанаар сүүлийн үед Трампын хөл хавагнаж эхэлсэн тул нарийвчилсан шинжилгээнд орсон аж.

Трамп аспирин ууж байгаа бөгөөд олон хүнтэй гар барьсны улмаас эдийн гэмтэл үүсэж хөхөрсөн хэмээн тайлбарлажээ.

Өдгөө 79 настай Трамп өөрийгөө эрүүл чийрэг хэмээн байнга онцолдог бөгөөд “АНУ-ын түүхэн дэх хамгийн эрүүл ерөнхийлөгч” хэмээн өөрийгөө тодорхойлж байсан ч удаатай.

Харин саяхан оношлогдсон энэ өвчин нь венийн судасны архаг дутагдал буюу хөлийн венийн судсууд зүрх рүү цус дамжуулж чадахгүй болсон үед үүсдэг өвчин аж.

Гэхдээ энэ ноцтой түвшинд биш гэдгийг Цагаан ордны хэвлэлийн төлөөлөгч онцолжээ. Цагаан ордны эмч албан бичигтээ "аюулгүй бөгөөд түгээмэл" өвчин гэж тодотгоод 70-аас дээш насныханд элбэг тохиолддог гэсэн байна. 
Энэ сарын 13-нд Нью Жерсид болсон тоглолтын үеэр Трампын хөл хавагнасан мэт зураг нийтлэгдсэн. Түүнчлэн Бахрейны Ерөнхий сайдтай Цагаан ордонд уулзах үеэр түүний гар хөхөрсөн нь гэрэл зурагт буусан.

Үүнээс өмнө буюу хоёрдугаар сард Францын ерөнхийлөгч Эммануэль Макронтой уулзах үеэр ч Трампын гар хөхөрсөн зураг нийтлэгдэж байв. 

Улмаар эдгээр нь Трампыг ямар нэг нууцлаг өвчин туссан байх магадлалтай гэсэн цуурхал дагуулж эхэлсэн юм. 

Эх сурвалж: ВВС