ХХОАТ-ын тухай хуульд өөрчлөлт оруулах тухай хуулийн төслийн хэлэлцүүлэг болж байна. 100 мянган иргэний саналыг үндэслэн УИХ-ын гишүүн Ж.Баярмаа, О.Амгаланбаатар, Б.Пунсалмаа, Г.Очирбат нар хуулийн төсөл санаачлан ажиллаж байна.

УИХ-ын гишүүн Ж.Баярмаа:

Манай татварын бодлого нь ердөө төсвийн зардлыг санхүүжүүлэхэд чиглэдэг дутагдалтай. Тиймээс асар их татвар хураадаг байх. 10 жилийн сүүлийн хугацаанаас харахад 2015 онд 6 их наяд орлоготой байсан бол 2025 онд 33,5 их наяд төгрөгийн орлого буюу 5,6 дахин улсын төсвийн орлого нэмэгдсэн. 2015 онд 7,1 их наяд төгрөгөөр амьдарч болж байсан бол өнөөдөр 33,7 их наяд болсон сүүлийн 10 жилд тав дахин өссөн байна. 

Монгол иргэний цалин 2015 онд 688 мянган төгрөг байгаа бол өнөөдөр 2,2 сая төгрөг байгаа юм. Өөрөөр хэлбэл 3,2 дахин өссөн мөртлөө зардал 5 дахин, төсвийн орлого 5,6 дахин өссөн байгаа. 

Сард 10 сая хүртэлх төгрөгийн цалинтай хүн 99,2 хувь байдаг. ₮10 саяас дээш орлоготой иргэд нь дундаж, дунджаас дээш чинээлэг бүлэг гэж үзэх нь байна. Гэтэл тэд ердөө 0,8 хувь буюу найман мянган иргэн байдаг. Тэднийгээ ад үзэх шинжтэй байдаг. Өсөлтийн татварын зарчмын хувьд баян хүнээс өндөр татвар авч орлого багатайд нь өгнө гэдэг социалист татварын бодлого байгаад байдаг. Гэтэл Монголд наймхан мянган хүнийг ад үзэж, 10 хувь, 30 хувийг авна гэх ямар ч шаардлага байхгүй. Тэд элдэв татвар, үнийн өсөлт, инфляц гэсээр арайхийн тэндээ дэнжигнэж байгаа хүмүүсийг доош нь уруудуулахгүй шиг илүү дээш нь явуулахын төлөө Монгол Улс ажиллах ёстой. Тэгж байж тэд улам дэвжиж дээшилнэ. 

2 сая төгрөгийн цалинтай хүн байлаа гэхэд ХХОАТ-т нь 1 хувийг нь авахад өөрт нь 180 мянган төгрөг үлдэж байгаа юм. Тэр мөнгөөрөө шуудай гурил, уут будаагаа аваг. 1 хувь болгосноор дараах эерэг үр дүн гарна. 

1. Иргэдийн бодит орлого илт нэмэгдэнэ. 
2. Сүүдрийн эдийн засаг хумигдана.
3. Хөдөлмөрийн идэвх өснө.
4. Ажилтны цалин хөлс нэмэгдэнэ.
5. Гадаадын хөрөнгө оруулалтад эерэг мессеж болно. 
6. Татвар төлөгчдийн хүрээ тэлнэ
7. Хувиараа бизнес эрхлэгчдийн сонирхол нэмэгдэнэ
8. Хэмнэсэн мөнгөө иргэд хөрөнгийн зах зээлд зарцуулна

Дэлгэрэнгүйг дараах видеоноос хүлээн авна уу. 

УИХ-ын гишүүн Б.Пунсалмаа:
ХХОАТ-ын хувийг 10 биш 1 болгох нь гишүүд бидний хүсэл биш, энэ бол ард иргэдийн хүсэлт юм. Нэг иргэн 3 сая төгрөгийн цалин авлаа гэхэд 900 мянга, бараг 1 сая төгрөг нь татварт явж байна. 2 саяын цалинтай бол 1 саяыг гар дээр авах жишээний. Өндөр хөгжилтэй орнуудын татвар өндөр байна, биднийх харин ч бага мэтээр ойлгуулах гэдэг. Гэтэл тэдний татварын буцаан авалт нь өндөр буюу хүүхдийн сургалтын төлбөр, орон сууц худалдан авалт гэх мэт бодит хэрэглээнд нь дорвитой нэмэр болдог тул татварын дарамт болдоггүй.