Монголын Арьс Өнгөний эмч нарын нийгэмлэгийн IV их хурал өнгөрсөн 7 хоногт болсон. Энэ үеэр манай улсад түгээмэл тохиолдож буй арьс харшлын өвчний талаар “Аллерги мед” эмнэлгийн арьс харшлын их эмч Н.Ням-Очироос тодрууллаа.

Тэрбээр, “Одоогоор арьс харшлын өвчнүүдээс чонон хөрвөс зонхилон тохиолдож байна. Энэхүү өвчин нь дархлааны системтэй холбоотой, олон эмнэл зүйн хэлбэртэй арьс харшлын өвчин. Чонон хөрвөсийг дийлэнх тохиолд хүнсний харшил сэдрээдэг. Хувь хүн өөрийн харшлах хүнсээ мэдэхгүйн улмаас энэ төрлийн өвчинд өртөх нь элбэг.

Харин хүмүүс гэрээрээ эмчлэх гэж оролддог, дур мэдэн эм уудаг гэх зэргээр эмчлэхэд хүндрэлтэй болдог.

Өөр тохиолдлууд гэвэл, хүйтэрч ханиад томуу ихсэх үед халдварын шалтгаантай чонон хөрвөсүүд элбэг тохиолдоно. Бактери, вирусийн халдвар авахаар тухайн хүний дархлааны системд өөрчлөлт ордог. Түүнчлэн монголчуудад түгээмэл тохиолддог чонон хөрвөсийн нэг нь физикийн шалтгаантай байдаг. Халуун хүйтэнд гарахаар арьсан дээр бэлцрүү, тууралт, улайлт, загатнаа үүсгэдэг чонон хөрвөсүүд бий. Удамшлын ген, хоол хүнс, амьдралын хэв маяг бас нөлөөлнө.

Эмнэл зүйн хэлбэрээрээ хөнгөн, дунд, хүнд зэрэгтэй. Хүнд хэлбэрийн чонон хөрвөс нь зөөлөн эдийн хавангууд, гуурсан хоолойн багтраа, хоолой боох зэрэг эрсдэлтэй. Эхний шинж тэмдэг нь арьсан дээр бэлцрүүт улаан тууралт гарч, загатнаа үүсгэдэг. Чонон хөрвөс цочмог шатан дээрээ эмчлэгдэх боломжтой.

Харин хүмүүс гэрээрээ эмчлэх гэж оролддог, дур мэдэн эм уудаг гэх зэргээр эмчлэхэд хүндрэлтэй болдог. Арьсан дээр өмнө нь гарч байгаагүй тууралтууд гарах үед арьс харшлын мэргэжлийн эмчид хандан эмчлүүлэх хэрэгтэй” гэж зөвлөлөө. 

Г.Халиунаа