БОУАӨ-ийн сайд Ц.Сандаг-Очир Холбооны Бүгд Найрамдах Герман улсаас Монгол улсад суугаа онц бөгөөд бүрэн эрхт элчин сайд Хэльмут Кулитцтай уулзлаа.

Уулзалтаар ХБНГУ-ын KFW банкны санхүүжилтээр хэрэгжиж буй “Биологийн олон янз байдлыг хамгаалах, уур амьсгалын өөрчлөлтөд дасан зохицох” төслийн хэрэгжилт, цаашдын үе шатанд үндэсний байгууллагуудын оролцоог нэмэгдүүлэх, салбарын чадавхыг бэхжүүлэх асуудлыг онцлов.

Мөн талууд ойн тооллого, сав газрын захиргаадын чадавхыг бэхжүүлэх чиглэлээр хамтран ажиллах боломжийг хэлэлцэж, Монгол Улсын зүгээс шаардлагатай урсгал зардал, дотоод зохион байгуулалтыг хангах боломжтойг илэрхийлжээ.

Цаашлаад ойн тогтвортой менежментийг хөгжүүлэх, олон зорилтот ойн тооллогын төслийг дахин эхлүүлэх асуудлаар санал солилцсон аж. 

Түүнчлэн Монгол Улсад 2026 онд зохион байгуулагдах Цөлжилттэй тэмцэх тухай НҮБ-ын конвенцын Талуудын бага хурал (COP17)-ын бэлтгэл ажлын хүрээнд хамтын ажиллагааг эрчимжүүлэх, шаардлагатай санхүү, бодлогын дэмжлэг үзүүлэхийг хүсжээ.

Эх сурвалж: БОУАӨЯ