Увс аймаг үүсэн байгуулсны 100 жилийн ойн баяр наадам үргэлжилж байна. Хүчит бөхийн барилдааны үеэр Урлагийн гавьяат зүтгэлтэн Д.Цэрэнсамбууг 100 сая төгрөгөөр шагнав.

Түүнийг Улаанбаатар хот дахь Увс аймгийн нутгийн зөвлөлийн даргаар, бөхийн “Увс нуур” галын гүйцэтгэх захирал, тэргүүлэгчээр 16 жил сэтгэл зүтгэл гарган үр бүтээлтэй ажиллаж, Увс нутгийнхны бахархах олон амжилтыг бүтээлцсэнд талархал илэрхийлж буй юм байна.

Талархлыг Эрчим хүчний сайд, Улаанбаатар хот дахь Увс аймгийн нутгийн зөвлөлийн дарга Б.Чойжилсүрэн гардуулж буй аж.

Ташрамд дурдахад, УГЗ Д.Цэрэнсамбуу Улсын Драмын эрдмийн театрын захирлаар ажиллаж байсан. Мөн бөхийн “Увс нуур” галын гүйцэтгэх захирлаар 20 гаруй жил ажилласан юм.

Харзтайн амралтад Ж.Ганболд заан, Г.Жамсран нар ахлаад залуучууд голдуу Увсын бөхчүүд 2001 онд наадмын бэлтгэлд гарч байв

“Увс нуур” бөхийн галтай анх хэрхэн холбогдсон тухайгаа тэрбээр “1990-ээд оны сүүлээр Х.Баянмөнх аварга тэргүүтэй Увс нутгийн бөхчүүд, улс төр нийгмийн зүтгэлтэн, бизнесменүүд санаа нэгдэж манай “Увс нуур” галыг байгуулсан юм билээ.

Би тэр тухай сонсож л байснаас ажилд нь оролцдоггүй байсан. Манай найз гавьяат тамирчин, аймгийн хурц арслан, алдарт бөх Галдангийн Жамсран 2000-аад оны эхэнд надтай уулзаад манай нутгийн сайн барилдаж байгаа залуу бөхчүүд олон байна. Эднийг нэгдсэн зохион байгуулалтад оруулж, хөрөнгө санхүүгийн хувьд дэмжлэг туслалцаа үзүүлж, бэлтгэл сургуулилалт хийлгэх хэрэгтэй байна гэсэн санал хэлсэн.

Бид хоёр энэ талаар ярилцаад тэр үеийн Хууль зүйн сайд Ц.Нямдорж гуайтай уулзаж,  нутгийнхаа бөхчүүдэд дэмжлэг үзүүлэх талаар хүсэлтээ уламжилсан юм. Сайд бидний санал хүсэлтийг тун нааштайгаар хүлээн авч, нутгийн бизнесмен хэдэн хүнтэй ярьснаар хөрөнгө санхүүгийн хувьд дэмжлэг туслалцаа авсан. Ингээд Харзтайн амралтад Ж.Ганболд заан, Г.Жамсран нар ахлаад залуучууд голдуу Увсын бөхчүүд 2001 онд наадмын бэлтгэлд гарч байв” хэмээн манай сайтад ярилцлага өгч байв.

Ярилцлагыг бүрэн эхээр нь ЭНД-ээсс унших боломжтой.