Комикс ном, анимэйшн бүтээгч бүх насны уран бүтээлч, сонирхогчдын дунд зохион явуулсан "Монголын Анимейшн Комикс Манга Авардс" /МАКМА/ улсын анхдугаар уралдааны ялагчдыг өчигдөр Япон-Монголын төвд зарлалаа.

Энэхүү үйл ажиллагаанд Японы Манга холбооны гишүүн, Азийн Манга Саммитийн гишүүн, Дижитал Манга холбооны гишүүн, Япон Улсын Гадаад хэргийн яамны Олон Улсын Манга Авардсын шүүгч нарын зөвлөлийн гишүүн, Алдарт мангачин Күрата Ёшими MAKMA‬ уралдаанд хүндэт зочноор уригдан лекц уншсан  билээ.

Авьяас чадвар, уран сэтгэмжээрээ өрсөлдсөн комик, анимейшн сонирхогч хүүхэд залуус, уран бүтээлчдэд Японд аялах эрхээр шагналаа.

MAKMA -Анхдугаар уралдаанд нийт 102 бүтээл ирүүлснээс:

• Анимэйшн төрөлд-38 бүтээл
• Комик ном төрөлд-20 бүтээл
• Комик стрип төрөлд-44 бүтээл ирж, шүүгчид дүнгээ нэгтгэн шилдгийн ШИЛДГҮҮД тодорлоо.

МАКМА уралдааны зохион байгуулагч "Нүүдлийн зурган өгүүлэмж" сангийн тэргүүн, уран бүтээлч Н.Эрдэнэбаяраас уралдааны үр дүнгийн талаар тодрууллаа:

-Уралдаанд ирүүлсэн бүтээлүүдээс оролцогчдын ур чадвар хэрхэн дүгнэх вэ?
-Уралдаанд маш өндөр чанартай бүтээлүүд ирлээ. Анх уаа зохион байгуулж байгаа гэдэг утгаар ойрын гурваас дөрвөн жилийн хугацаанд хийсэн бүтээлүүдийг оролцуулсан. Мөн бид бүх төрлийн анимейшнийг ирүүлэхийг хүссэн. Нийт ирж байгаа бүтээлүүдэд агуулга, сэдэв, сэдвийн гүйцэтгэл зэрэг үзүүлэлтүүдийг харж, контентын чиглэлээр мэргэшсэн мэргэжлийн баг бүрдүүлэн шүүлтээ хийсэн.

-Комик стрипт хайр гэдэг сэдэв өгсөн. Агуулгын хувьд оролцогчдын бүтээлүүд хэр сонирхол татаж байв?
-Хүүхэд залуус олон өнцгөөс харж байгаа нь  анзаарагдлаа. Тэр дотор чанартай бүтээл олон байсан. Комик стрипийн төрөлд хамгийн гол нь дөрвөн нүдний төгсгөлийн нүдэнд хамгийн гол хүнд өгөх гэж буй мессеж, богино хугацаанд сэтгэл хөдөлгөх, тэсэхгүй инээх мэдрэмжийг өгөх агуулга орж байх ёстой. Комик стрипт хамгийн богинохноор, хамгийн хурцаар, хамгийн ойлгомжтойгоор илэрхийлэх ёстой байдаг. Тэр ч  утгаараа нарийн ширийн уран гоё зурахаас илүү тухайн гаргах гэж байгаа санаагаа зөв илэрхийлэх нь чухал.

30 МИНУТЫН КОМИК СТРИПИЙН УРАЛДААНД:

Тусгай байрын шагнал А.Эмүүжин

46-р сургуулийн сурагч А.Эмүүжин:

"Хүн спортод муу ч өөрийн сонирхлоор мөрөөдлөө биелүүлэх боломжтой гэдгийг энэ зургаараа илэрхийлэхийг зорьсон" гэлээ.

А.Эмүүжин:

ЯПОНЫ АЛДАРТАЙ МАНГА ЗУРААЧ КҮРАТА ЁШИМИЙН НЭРЭМЖИТ ШАГНАЛ

/Японд аялах эрх бүхий шагнал/

Ч.Онон “Гэр бүл” бүтээлээрээ

Б.Батбаяр “Бэлэг” бүтээлээрээ хүртлээ.

КОМИК СТРИП /оролцогчдод "Хайр" гэсэн сэдэв өгчээ/

Тэргүүн байр Ц.Баасанхүү /Японд аялах эрх/

КОМИК НОМ

Тусгай байр “Зургаадай” А.Болортуяа /Японд аялах эрх/ -Аав хүү хоёр он цагаар хэрхэн хөгжилтэй аялсан тухай гардаг

Дэд байр “Био танк” Б.Анхбаяр /Японд аялах эрх/

Чөлөөт уран бүтээлч Б.Анхбаяр:

"Анхны санаа 2006 онд гарсан. Зохиолоо бичээд, өнгөрсөн нэг жил тасралтгүй хийлээ. Энэ бүтээлээрээ өөрийн гэсэн баатрыг гаргая гэж зорьсон. Уг бүтээлд сайн муу хоёр, гэрэл харанхуйн зөрчлийг гаргахыг хичээсэн. Би багаасаа комик манга сонирхдог байсан учраас өөрийн гэсэн бүтээлийг хийе гэж боддог байлаа. Ингээд анхны бүтээлээрээ уралдаанд оролцлоо" гэлээ.

Тэргүүн байр Б.Мөнхбилэг “Толь” бүтээлээрээ /Японд аялах эрх/

АНИМЕЙШН

Дэд байр “Ойн зүүд” бүтээлээрээ Г.Нарантуяа

Тэргүүн байр  “Fixer” бүтээлээрээ Ж.Бат-Эрдэнэ

"Би уралдаан зарлагдсаны дараа бүтээлээ эхэлж хоёр сар гаруйн хугацаанд хийсэн. Ажилтай, хүсэл зорилготой хүнд цаг хугацаа маш үнэ цэнэтэй санагддаг бол зорилгогүй хүн цаг хугацааг үнэгүйдүүлж, үр бүтээлгүй өнгөрөөдөг гэдгийг илэрхийлэхийг зорьсон. Анимейшн чиглэлээр ШУТИС-ийн компьютер график дизайны ангийг төгсөөд, бакалавр, магистрын зэрэг хамгаалж, нийт есөн жил орчим компьютер график, тэр тусмаа 3D анимейшн чиглэлээр ажиллаж байна" гэлээ.

Оролцогчдын бүтээлүүдээс танилцуулж байна