УИХ-ын чуулганы хуралдаан эхэлж  Засгийн газрын өргөн барьсан татварын 90 хувийг аж ахуй нэгжүүдэд буцаан олгох тухай, анхны хэлэлцүүлгийг хийлээ.

Хуулийн төсөлтэй холбогдуулан гишүүд асуулт тавьж зарчмын зөрүүтэй саналын томъёоллоор санал хураалт явуулахад ихэнх нь дэмжигдсэнгүй.

Манай улс 1998 оноос Нэмэгдсэн өртгийн албан татварын тухай хуулийг мөрдөж ирснээс хойш нэмэгдсэн өртгийн албан татвар төлөгчөөр бүртгүүлэх борлуулалтын орлогын хэмжээг 10 сая төгрөгөөр тогтоож өнөөг хүртэл 16 жил өөрчлөлт оруулалгүй хэрэгжүүлж ирсэн.

Харин энэхүү 10 сая төгрөгийн суурийг эдийн засгийн нөхцөл байдал, тухайлбал бараа бүтээгдэхүүний үнийн өсөлттэй уялдуулан өөрчлөх шаардлагатай байгаа аж.

Сангийн яамнаас гаргасан тооцоогоор 2013 оны жилийн эцсийн байдлаар нийт НӨАТ төлөгчдөөс 10 сая хүртэл борлуулалтын орлоготой татвар төлөгч 21 хувийг эзэлж байхад 50 сая хүртэл борлуулалтын орлоготой татвар төлөгч 45 хувийг эзэлдэг байна.

Хэлэлцүүлгийн төгсгөлд Ерөнхий сайд Н.Алтанхуяг “Энэ хуулийн төслийг УИХ-ын гишүүд будилуулсаар байгаад унагаачихлаа. Энэ хуулийн төсөл жижиг, дунд аж ахуй нэгжүүд буюу 1,5 тэрбум төгрөг хүртлэх орлогтой аж ахуй нэгжүүдээ татварын бодлогоор дэмжих байсан. Гэвч УИХ-ын гишүүд үүнийг унагаж байгаа учраас Засгийн газар хуулиа эргүүлэн татаж авъя даа. Эдийн засгийг эрчимжүүлэх 100 хоногт их том түлхэц болох хуулийн төсөл байсан юм” гэдгийг хэллээ.

Засгийн газраас Аж ахуй нэгжийн орлогын албан татварын тухай хуульд нэмэлт оруулах тухай хуулийн төслөө ийнхүү эргүүлэн татаж авлаа.

Гэхдээ дахиад УИХ-д өргөн барина гэдгээ Ерөнхий сайд хэлсэн юм.