УИХ-аар эдийн засгийг эрчимжүүлэх хөтөлбөрийн анхны хэлэлцүүлгийг хийж байна. Уг тогтоолын төслийн заалт бүрээр нь гишүүдийн саналыг сонсож, дэмжих эсэх санал хурааж байна.

Уг тогтоолын төсөлд төрийн байгууллагууд хэвлэл мэдээллийн хэрэгсэлтэй хаалтын гэрээ хийж, татвар төлөгчдийн мөнгийг зарлагаддагийг зогсоох заалт оруулжээ. Уг заалтыг тойрч, гишүүд санал бодлоо илэрхийллээ.

Ерөнхий сайд Н.Алтанхуяг: Хаалтын гэрээ гэсэн нэрийг албажуулж, хуулийн нэр томъёо болгож болохгүй. Хаалтын гэрээ гэж юу юм. Энэ асуудал өмнөх Засгийн үед байсан юм билээ. Та нар зүүдээ ярих гээд хулгайгаа ярьж болохгүй шүү дээ.

Д.Сарангэрэл: УИХ-аар 2009 онд энэ асуудлыг хэлэлцэж байхад сэтгүүлч Авирмэд, “Цайны газраас мантуун бууз авч идээд, мөнгийг нь өгөхгүй гардаггүй биз дээ” гэж шүүмжилж байсан. Үүнтэй утга нэг асуудал ярьж байна. Төр ажлаа үнэ төлбөргүй сурталчлуулна гэж болохгүй.

М.Батчимэг: Хаалтын гэрээ гэж байх ёсгүй. Төрийн байгууллагууд мэдээллээ ил тод байлгах ёстой. Татвар төлөгчдийн мөнгөнөөс зардал гаргаад, иргэдийнхээ нүдийг хааж боох хэрэг байхгүй.  

Н.Алтанхуяг: Энэ асуудлыг тусгайлан ярих хэрэгтэй. Засгийн газар хаалтын гэрээ хийгээгүй, хийх ч үгүй. Буруу, зөвийг нь хэл, шүүмжил, нээлттэй ил тод бай. Мөнгөтэй хүмүүс хэвлэлийнхнийг хөхүүл хурга шиг болгосон нь үнэн.

Үүнийг бид хамтаараа засна. Гэхдээ тэнцвэргүй тулаан болж байна. Бүх хэвлэл хувийн хэвшилд байна. Улстөрчид хэвлэлийнхнийг мөнгөөр худалдан авч болохгүй. Энэ асуудлаар УИХ хаалттай хэлэлцэж, хуулиар зогсоох ёстой гэж ярилаа.

Хоёр гурван Засгийн газар дамжин яригдаж байгаа хаалтын гэрээний асуудлыг хуулиар шийдэх цаг болсон гэдэгт гишүүд санал нэгдээд, тусгайлан хууль гаргах хэрэгтэй гэж үзэв.

Хаалтын гэрээний асуудал эдийн засгийг эрчимжүүлэхэд хамааралгүй асуудал учир уг тогтоолд оруулсан энэ тухай заалтыг гишүүд дэмжсэнгүй.