Хан-Уул дүүргийн I хорооныхон гоё цэцэрлэгт хүрээлэнтэй болох нь.

Хэдэн жилийн өмнө 120 мянгатын автобусны хойно байрлах энэхүү хэсэг талбайн гадуур нэгэн эрх мэдэлт этгээд цэнхэр хашаа хатгаж, тус хорооны оршин суугчдын эсэргүүцэл хүчтэй байсны үр дүнд болиулж чадсан.

Иргэдийн аварч үлдсэн энэ сайхан талбайг нийслэлээс нэмж тохижуулж, хотын ногоон байгууламж нэгээр нэмэгдэж байна.

Тохижилтын ажил долдугаар сарын 1-нд дуусах байсан ч хугацаандаа амжаагүй учир наймдугаар сарын 15-нд дуусгахаар төлөвлөсөн гэдгийг албаны хүн хэлсэн юм.
 

Энд зуу гаруй мод суулгаж, ногоон байгууламж, зам талбай, хүүхдийн тоглоомын талбай, усан оргилуур зэргээр тохижуулжээ. Нийслэлийн төсвийн хөрөнгөөс 1 тэрбум 300 саяын өртгөөр тохижуулж байгаа тус ногоон байгууламжийн гүйцэтгэгчээр “БҮҮХ” ХХК, “Монгол тохь” ХХК ажиллаж байгаа аж. Тохижилтын ажил бүрэн дууссаны дараа бид та бүхэнд фото мэдээлэл хүргэх болно.

Нийслэл хотод минь энэ мэт ногоон байгууламж, иргэд эрүүл мэнддээ анхаарч гүйх зам талбай, амрах тухлах газар олноор баригдаасай.