Хүний эрхийн Үндэсний Комиссын дэргэдэх Хүний эрх хамгаалагчийн хорооны V хуралдаан өнөөдөр /2023.09.29/ боллоо.

Хүний эрх хамгаалагчийн хороо нь хүний эрх хамгаалагчийн эрх зөрчигдсөн эсэх талаарх гомдол, мэдээлэл хүлээн авах, нотолгоо, баримт, мэдээлэл цуглуулах, эрсдэлийн үнэлгээ хийх, дүгнэлт гаргах чиг үүргийг хэрэгжүүлдэг.

Хорооны энэ удаагийн хуралдаанаар “Эрдэнэт” ТӨҮГ-ын Барилга засварын цехийн Үйлдвэрчний эвлэлийн хорооноос гаргасан гомдол болон иргэн З-ийн гаргасан гомдлын дагуу гүйцэтгэсэн Хорооны дүгнэлт, иргэн С-ийн гаргасан гомдлын дагуу гүйцэтгэж буй үйл ажиллагааны явцыг танилцуулж, хорооны гишүүдээс санал авлаа.

Мөн 2023 оны 03 дугаар сарын 09-ний өдрөөс хойш гүйцэтгэсэн ажил, цаашид хийх ажлын төлөвлөгөөнд санал солилцож, хорооны ээлжит хуралдааныг 2023 оны 12 дугаар сард хийхээр товоллоо.

Ташрамд дурдахад, Хүний эрх хамгаалагчийн хорооны даргаар ХЭҮК-ын Хүний эрх хамгаалагчийн асуудал эрхэлсэн гишүүн С.Дондов, хорооны гишүүдээр Л.Баасанжав, Х.Баасанжаргал, Ц.Оюунбаатар, Ц.Отгонтунгалаг, Э.Сундуй, Ч.Ундрах нар ажиллаж байна.

Эх сурвалж: ХЭҮК