Хангайн СУВД гэгддэг байгалийн үзэсгэлэн цогцолсон Улаагчийн хар нуур нь дотоодын аялагчдын топ зорих газрын нэг болоод байна. Үүнтэй холбоотой аялагчид хэрхэн хүрэх, ямар зам болон тээврийн хэрэгсэл сонгох нь оновчтой зэргийг нэгтгэсэн мэдээлэл дутмаг байгаа нь  энэхүү зөвлөгөөг бичих шалтгаан боллоо.

Завхан аймгийн Эрдэнэхайрхан сумын төвөөс зүүн хойш 80 км, аймгийн төвөөс хойш 110 км, Улаанбаатар хотоос баруун хойш 1214 км газарт орших Улаагчийн хар нууранд ерөнхийдөө хоёр замаар очих боломжтой.

1-р зам: Улаанбаатар хотоос Завхан аймгийн Тэлмэн сум хүртэл 860 км засмал замаар яваад цааш 50 км шороон замаар явж Улаагчийн хар нуур хүрэх,

2-р зам: Баруун аймгуудаар аялсан аялагчид буцахдаа Увсаар дайран Улаагчийн хар нуурыг зорих нь элбэг бөгөөд Завхан аймгийн Цэцэн уул руу салдаг замаар салж, тус сумаар дайраад очих нь хамгийн бартаа багатай зам болохыг туршлагатай аялагчид зөвлөдөг.

Ингэж явахад 100 орчим км-г элстэй замаар явдаг тул жижиг оврын машинтай бол зүглээд ч хэрэггүй шүү.

Улаагчийн хар нуур луу хүрэх шороон зам нь аль ч талаасаа элсээр хучигдсан бартаа бүхий замтай тул ганц машинтай болон жижиг суудлын машин очих нь эрсдэлтэй гэдгийг анхаарах хэрэгтэй болов уу.

Улаанбаатараас шууд зорин очих аялагчдын хувьд аяллын ирж очих хоногоо хамгийн багадаа 4 хоногоор төлөвлөх нь тохиромжтой.

Төгсгөлд нь та замд гарахаасаа өмнө машины запас дугуй, хөдөлгүүрийн тос, хөргөх шингэн, багаж хэрэгсэл, газрын зураг болон элсэрхэг Говь нутагт очих тул та цэвэр усаа сайтар базаах хэрэгтэйг сануулах юун.

Дэлгэрэнгүй мэдээллийг joinme.mn-ээс хүлээн авна уу.