-"Сант марал" судалгааны энэ удаагийн онцлог юундаа байна?
-Энэ удаагийн судалгаа маань онцлоггүй л нэгэн судалгаа болсон гэж хэлж болно. Яагаад гэвэл хаврын эсвэл өнгөрсөн жилийн намрын судалгаатай харьцуулахад нэг их том өөрчлөлт гараагүй. Намуудын рейтингийн хувьд ч улстөрчдийн рейтингийн хувьд ч олигтой өөрчлөлт байсангүй. Ганц хоёр байраар урд хойноо орон солигдсон байгаагаас өөр зүйлгүй. Намуудын хувьд хэрвээ 3 сард Хувьсгалт намын рейтинг 30%, Ардчилсан намын рейтинг 32.6% байсан бол одоо хоёулангийнх нь рейтинг бага зэрэг буугаад Хувьсгалт намынх нь 28.3%, Ардчилсан намынх 31.2% болсон байгаа. Буурсан гол шалтгаан нь ерөнхийдөө жижиг намуудын рейтинг нэг их өсөөгүй болохоор бие даагч хүн ч гэсэн илүү санал аваагүйгээс үүдэлтэй гэж гарч байна.

-Улс төрчдийн хувьд өөрчлөлт оров уу?
-Улс төрчдийн хувьд байсан хэдэн хүмүүс нь байрандаа хэвээрээ л байж байна. Нийт түүврийнх нь эхэнд Энхбаяр байгаад Элбэгдорж үзүүрт байсан бол одоо байраа сольсон байна. Гүндалай З-т нь хэвээрээ байгаа. Багабанди бол хуучнаа бодвол нэг байр дээшилсэн. Энийг нэг их том хөдөлгөөн гэж ойлгож болохгүй. Өөр нэг анзаарагдаж байгаа үзүүлэлт бол засгийн газрын рейтинг тогтмол буурах болсон.

-Өмнөх үзүүлэлт дүгнэлтээс хэдэн хувиар буурсан байна?
-Хувь гэж хэлэхэд арай болоогүй. Гэхдээ ямар ч л байсан төр засагтаа итгэх итгэл 3 сард бүрэн нийцэж байна гэсэн хэсэг нь 16% байсан бол 8.5% хүртлээ буурсан байна. Ерөнхийдөө ойрын арван хэдэн жилдээ итгэх итгэл хамгийн муу нь Наранцацралтын засгийн газрын үед байсан. Тэгвэл тэр рекорд бараг эвдэгдэх гээд байна.

-Судалгааны үндсэн чиглэл нь?
-Улс төр, эдийн засаг, улстөрчдийн хувийн амьдралын талаар ямар бодолтой байдаг вэ? Монголын түнш орон гэж ямар улсыг хэлж болох вэ гэдэг ч юм уу ийм асуулгуудыг ард иргэдийн дунд нээлттэй явуулаад дүгнэлт гаргасан байгаа. Энэ дүгнэлтээс харахад гадаад орнуудын рейтинг нь өөрчлөгдөөгүй ганцхан Оросын рейтинг 51.9% байсан бол 63% хүртлээ өссөн байгаа юм.