“Төрийн минь сүлд өршөө” хэмээн Монголчууд туг сүлдэндээ мөргөдөг цорын ганц ард түмний нэг билээ.

Төрсөн газар, уул усаа шүтэн биширч, хүндлэн дээдэлдэггүй монгол хүн гэж хаа ч үгүй. Ийнхүү элэг зүрхнээс уяатай элгэн халуун нутаг усаа санагалзах үед сүсэглэн залбирах өөрийн гэсэн туг далбаатай байх нь хүн бүхний хүсэл мөрөөдөл юм. Эндээс үүдэл санаачилгатайгаар Төв аймгийн Засаг даргын тамгын газрын Төрийн захиргаа удирдлагын хэлтсийн дарга С.Үнэнбуян бүх сумдыг хүндэтгэлийн туг далбаатай болгожээ.

Энэхүү туг далбаа нь тухайн сумдын өвөрмөц онцлог, тахин шүтэж явдаг уул ус, бэлгэдэл, өв уламжлал, зан заншил зэргийг харуулсан бөгөөд үнэхээр гүн гүнзгий утга агуулгатай болсон нь хэн хүний сэтгэлд нийцтэй шинэлэг ажил болжээ.

Ийнхүү 20 сум өөрийн бэлгэдэлтэй болж түүнийг төрийн хүндэтгэлийн өрөөнд байрлуулахаар эхийг бэлтгэн загварыг хийжээ. Уг бэлгэдлийн далбааг айл бүр гэртээ залж “Миний нутгийн сүр сүлд” хэмээн залбирч явахад илүүдэхгүй юм байна хэмээх иргэд олон байсан. Сумдын тугны арын хэсэгт тухайн сумын газар нутгийн байршлын зургийг байрлуулсан нь уг бэлгэдлийн утга санааг улам ч тодруулсан байна.