Зул сарын баярын өдрүүд сагсан бөмбөг сонирхогчдын баярын өдөр байх бололтой. Учир нь энэ өдрүүдээр мэргэжлийн сагсан бөмбөгийн холбоо NBА-ын шинэ улирал эхлэх болно.

-“Бид сагсан бөмбөг тогломоор байна” гэсэн коммисинар Дэвид Стэрний үг олон хүний магнайг тэнийлгэсэн юм. Талууд бямба гарагт 149 өдрийн турш үргэлжилсэн ажил хаялт дууссаныг зарласан бөгөөд эзэд болон тоглогчид гар барилцсанаар арванхоёрдугаар сарын 25-нд шинэ улирлын анхны тоглолтууд хийгдэх боллоо.

2011-2012 оны улирлын эхний тоглолтууд Бостон Сэлтикс болон Нью-Йорк Никсийн тоглолтоор эхлэн, үнэ цэнэтэй тоглогч Дэррик Рөүсийн баг Лос Анжэлэст зочлон, үүний дараа Майами Хийт болон Даллас Мэврикс багууд тоглож өнгөрсөн улирлын финалын хариу авах тоглолт болох юм.

Энэ тухай Билли Хантэр:
-“Бид аль аль тал маань тоглолтуудаа эхлүүлж шийдэлд хүрэхийг хичээсэн” хэмээн ярьжээ. Өнгөрсөн долоо хоногийн хувьд талууд хаалттай уулзалтыг хийсний үр дүнд ийнхүү шийдэлд хүрсэн гэж хэлж болохоор байгаа бөгөөд баасан гарагт 15 цаг гаруй хуралдсаны эцэст эцсийн шийдэлд хүрчээ.

Магадгүй энэ шийдвэр үндэсний хэмжээний баярт өдөр байж болох юм. Ямар сайндаа АНУ-ын ерөнхийлөгч Барак Обама тэдний шийдвэрийг дэмжжээ.

Ийнхүү багууд бэлтгэлдээ арванхоёрдугаар сарын 9-нд гарах бөгөөд 66 тоглолт хийхээр төлөвлөж байгаа юм байна.

Та бүхэн шинэ улирлыг угтан авахад бэлэн үү?

Г.Зол-Эрдэнэ