Сүхбаатар дүүргийн I, XI, "Үйцай" сургуулийн 9-10 дугаар ангийн сурагчид "Хүүхэд солилцооны хөтөлбөр"-ийн хүрээнд Япон улсын Нагано мужийн Саку хотод зочлоод иржээ.

Тэд Японы ард түмний соёл, ахуй амьдрал, зан заншилтай танилцаж, дэлхийн дулаарал, агаарын бохирдолтой хэрхэн тэмцэж байгаа тухай мэдээлэл авсан байна. Мөн нарны эрчим хүчээр ажиллаааг үйлдвэртай танилцсан аж.

Саку хотод нарны эрчим хүчийг ахуй амьдралдаа хэрхэн ашиглаж байгааг судлан, нарны зайгаар ажилладаг жижиг автомашин угсарч, ажиллуулж туршсан нь хүүхдүүдэд их сонирхолтой санагджээ.

Үүнээс гадна хатуу хог хаягдлыг хэрхэн ангилахыг сурч, Саку хотын хог хаягдлыг шатааж устгах газар болон шатааж болохгүй хог хаягдлыг дарж булдаг "Уназава" газрын үйл ажиллагаатай танилцсан байна.

Түүнчлэн жимсний цэцэрлэгт хүрээлэнд очиж, үйл ажиллагаатай нь танилцахдаа Монголд ургах боломжтой алим, чавга жимсийг хэрхэн тарьж ургуулдаг, арчилдаг талаар газар дээр нь туршлага судалжээ.

Хөтөлбөрт хамрагдсан хүүхдүүдийг Саку хотын Сансар судлалын хүрээлэн, "Усуда" одон орон судлалын хүрээлэнтэй танилцуулж, одон орны дурангаар од эрхэсийг харуулж, одон орон, сансар судлалын сургалтад хамруулсан байна.

Г.Чимэг