Сүүлийн үед эмчийн зааваргүйгээр дурын эмийн сангаас худалдан авч болдог өвчин намдаах эмийн бэлдмэлийг хэтрүүлэн хэрэглэснээс олон хүн амиа алдаж байна хэмээн Америкийн анагаах ухааны мэргэжилтнүүд анхааруулж байна. Энэ нь хар тамхинаас ч илүү аюултай гэнэ.

Мэргэжилтнүүдийн үзэж буйгаар АНУ-д өвчин намдаах бэлдмэлийн хэрэглээ нь тахлын түвшинд хүрч байгаа аж. Сүүлийн арван жилийн хугацаанд хуулийн дагуу эмийн санд худалдаалагдаж байгаа өвчин намдаах эмнээс болж хорвоог орхисон иргэдийн тоо героиноос (мансууруулах бодис) хордож амиа алдагсдаас даруй гурав дахин их байсан байна. Хэргийн гол шалтгаан нь хүчтэй үйлчилдэг эмийн бэлдмэлийн худалдаа тун  сул байгаатай холбоотой аж.

Иргэдийн дунд хамгийн түгээмэл хэрэглэгддэг гурван эмийн тоонд викодин, метадон, оксикодон зэрэг өвчин намдаагч бэлдмэлүүд оржээ. Эдгээр эмнүүдийг эмч нар архаг өвчинтэй хүмүүст тайвшруулах зорилгоор бичиж өгдөг боловч өвчтөнгүүд тэдгээр эмийн бэлдмэлийг дур мэдэн хэтрүүлэн хэрэглэснээс эцэстээ үхэлд хүргэдэг гэдгийг мэддэггүй гэнэ.

Тухайлбал, өвчин намдаагч эм хэтрүүлэн хэрэглэснээс болж өдөрт 40 америк хүн хорвоогоос хальдаг байна. Судалгаанаас үзэхэд өнгөрсөн жил АНУ-ын 12 сая иргэн ямар ч эмчийн бичиггүйгээр өвчин намдаагч хүчтэй эм хэрэглэдэг гэдгээ хүлээн зөвшөөрчээ.

Түүнээс гадна ихэнх хүмүүс тэдгээр эмийн бэлдмэлийг архиар даруулан уухыг илүүд үздэг байна. Өдөрт дөрвөн ширхэг эм уудаг байсан бол аажмаар эмэнд дасал болж тунг арван ширхэг болтол нь нэмэгдүүлэх тохиолдол ч байдаг гэнэ.  

Ийм учраас эмч нар өвчин намдаах эмийн бэлдмэлийн худалдааг чангатгах тухай хуулийн төсөл нэн яаралтай санаачлах хэрэгтэй байгааг мэдэгджээ.

А.Цацрал